Que hubo Marieta Ras, suegra di Mike De Meza sutando 15 MIL pa luna den Board di ATA?
Parlamentario Endy Croes a reacciona riba un “cheap shot” cu a wordo lansa durante fin di siman. Diripiente den e mesun rosea di e problema di Serlimar oponentenan kier a tira gasolin riba e candela door di publica cu Nelson Orlando Oduber a wordo nombra como comisario den e Board di SETAR N.V. Kico ta e intencion tras esaki ta pa purba trece intrankilidad den Coalicion. Nos tur sa cu ki ora cu un gobierno cambia e ta pone su hendenan di confiansa den diferente Board pa asina por controla su bienesnan y percura pa ta den liña di maneho y ta cumpli cu e vision di gobierno. Pues desde 6 luna atras entre otro Nel Oduber kende ta un persona integro cu a sirbi e pais aki pa 4 termino, esta Gabinete Oduber 1 te cu 4 y kende nunca a haya su mes den ningun problema administrativo a wordo honra cu un posicion den Board di SETAR y asina duna un bes mas su contribucion na pais Aruba.
Right man on the right place
Netamente Nel Oduber conoce SETAR di paden y pafor y ta bou su maneho a restructura SETAR y convertie den un NV unda SETAR desde e tempo aya a crece y bira e compania cual SETAR ta awe. Nel Oduber a drenta BOARD na lugar di entre otro Franklin Hoevertsz, omo di Secretario di Conseho di Ministro di Mike Eman. Pues desde 2010 a nombra “OMO” di Mike Eman su man drechi, esta OMO di Secretario di Conseho di Ministro sr. Franklin Hoevertsz den BOARD di SETAR y e tempo ey tur cos ta masha bon pa e hendenan di AVP. Franklin Hoevertsz tambe a wordo nombra director di Utilities NV y ta strica rond di 26 mil florin pa luna eynan. Esaki tambe ta bon pa e fanaticonan di AVP. Pero como cu e ta AVP friends & family no ta conta? Dario Arends di Canal 90 tambe a traha desde 2010 den Board di SETAR. Tur hende sa cu ta amigonan masha yega na Mike Eman. Pues e ley di Friends & Family tampoco ta conta akinan?
Friends and Family na granel
Patricia Gwendoline Dowers casa di ex Minister Dowers tambe a wordo nombra den BOARD di Post Aruba NV desde October 2011. Aki tampoco e ley di Friends & Family ta conta? Freddy Every “Chief of Staff” di Benny Sevinger a wordo nombra den Board di Arutram. Aki tampoco e ley di friends and family ta aplicabel? Abogado SJIEM FAT Johan Paul intimo amigo di Mike Eman kende a strica den gobierno di Mike Eman mas di 5 MIYON Florin na deskundig advies ta nombra den Board di Freezone NV. Esaki ta friends of esaki ta family pero door cu ta AVP esaki lo no ta conta? Eduard Salomon “EDU” VOS candidato riba lista di AVP eleccion 2017 desde 2010 ta cobra den Board di Freezone NV. Esaki tambe ta ok y e ley di Friends and family aki tampoco ta aplicabel? Pa conclui e storia y pa pone e cherry riba e bolo Mike De Meza a kibra tur record. Mike de Meza su yiu a casa cu yiu di Marieta Ras. Djis un pregunta pa esnan di AVP cu ta critica asina tanto, con nos mester interpreta e relacion entre e famia aki? Sa nos kier sa. Mike De Meza a nombra Marieta Ras (suegra) Presidente di e Board di ATA cu un salario di Afl. 15 mil pa luna.
Persona di confiansa
Pakico mi ta trece esaki dilanti? Pasobra ora MEP nombra un persona di confiansa manera Nel Oduber (kende sigur no cu un salario di 15 mil pa luna) den un Board ta manera mundo a caba pa esnan di AVP riba Facebook y kier pinta tur pushi preto. Nel Oduber no mag di ta den ningun Board? Minister Chris Romero no por pone un hende di confiansa den ningun Board manera por ehempel mama di su propio yiunan pasobra mesora ta Friends & Family. Dowers si por a pone su casa den Board di Post Aruba NV y eynan si No ta friends & Family? Mientras 8 aña largo AVP a abusa cu famia y amigonan den diferente BOARD cu salarionan barbaro. Laga pueblo huzga pa su mes si un gobierno por pone su hendenan di confiansa pa cuida su interes of mester a mantene esnan di AVP den poder pa cuida e interes di e Coalicion aki? E diferencia ta cu no a paga 15 mil florin manera AVP si a paga y ta duna un vergoeding mucho mas decente entre 2000 y 3000 florin pa luna dependiendo e Board cu bo ta aden. Terminando Croes ta bisa, promer cu AVP papia tira un bista den boso propio cura.