Recientemente e hoben studiante Gilia Croes a presenta un programa piloto di un plataforma unda mucha y hoben por laga nan bos resona p’e cambio cu nan ta desea di mira na Aruba.
Minister Glenbert Croes a keda impresiona cu e proyecto aki cu a conta cu participacion di 7 scol basico. Topiconan di preocupacion vocifera pa nos muchanan tabata: Stop Bullying, Renobacion di Scolnan, No ta Facil pero Nos por Duna un Man, Educacion por Cambia bo Bida, Naturalesa sin Proteccion, Abo ta durf hisa bo dede den klas?, Don’t Bully, Be Humble Kind.
Locual cu tambe a impresiona e mandatario ta, ademas di e preocupacion cu nos muchanan ta biba cu ne, ta e edad di e participantenan cu ta varia di apenas 11 pa 13 aña. Muchanan cu no solamente ta biba cu e preocupacionnan aki pero cu na mes momento ta presenta con den nan bista mester soluciona nan tambe.
Ta Minister Glenbert Croes su deseo pa Parlamento Hubenil di Aruba bira e plataforma unda cu e muchanan aki ta haya e oportunidad pa expresa nan preocupacion, presenta nan solucion. Un Parlamento Hubenil cu ta reuni regularmente riba topiconan di nos Pais y cu despues ta presenta esaki na e mandatario.
Un felicitacion na e 7 muchanan y un reconocimento pa Gilia Croes cu ta e motor di e plataforma aki cu por conta cu sosten di Ministerio di Asunto Social y Labor pa bira un evento anual escolar na beneficio di e futuro di nos Pais. Nan, nos mucha y hobennan, tin e futuro di Aruba den nan man. “Y como nan mandatario actual nan tin mi compromiso di lo brindanan tur herment pa hunto nos logra e Pais cu nan merece”, tabata palabra di Minister Glenbert Croes.
Algun quotes cu e muchanan a presenta cu a laga un impresion profundo atras: “Be the Change You want to see in the World” di Mahatma Ghandi presenta pa Nicole Danje di 12 aña.
Otro quote cu Inald Fernandes Perna di 11 aña di edad e presenta ta “If you talk to a man in a language he understands, that goes to his head. If you talk to him in his language, that goes to his heart” expresendo su deseo pa por introduci Papiamento como idioma di instruccion na scolnan.
Zurayly Sprott su propio inspiracion ta expresa “Mi no kier proteha e medio ambiente pero mi kier crea un mundo caminda cu e medio ambiente no mester di proteccion”.
“Suicide is not the answer neither is bullying. We are equal so stop bullying, stand up and speak out”, preocupacion expresa pa Sadie Taylor di apenas 11 aña.
Minister na su turno a duna tur 7 participante un gesto sperando cu “nan por sigui skirbi e miho futuro pa nan mes y pa Aruba”.
