ORANJESTAD – Aruba Airport Authority N.V. (AAA) den un forma festivo a yama bonbini na e aerolinea Dominicano “Air Century” na Aruba dia 3 di Juli 2018.
Air Century ta un aerolinea Dominicano funda na 1992 door di e CEO y Presidente actual, e piloto y capitan Sr. Omar Chahin Lama; cu base di operacion na Aeropuerto Internacional Dr. Joaquín Balaguer (JBQ), na e ciudad di Santo Domingo, Republica Dominicana.
Na comienso Air Century tabata ofrese servicio di excursion y di propaganda aereo. Despues cu e flota di avion a crese y diversifica, e aerolinea a cuminsa opera buelonan charter cu servicionan di charter corporativo y transfer di crew, cu un market share di 90% den e region Caribe. Subsequentemente e aerolinea a desaroya rutanan domestico regular pa rutanan manera di Santo Domingo pa Punta Cana, Barahona, Santiago y Puerto Plata. Air Century ta ofrese su clientenan transporte aereo di calidad halto, sigurando buelonan safe cu avionnan cu ta pas cu e demanda di e mercado.
E buelonan pa Aruba lo wordo haci cu avionnan tipo Saab 340. E schedule di buelo ta consisti di buelonan pa Aruba riba Diamars y Diadoming, mientras cu buelonan pa Republica Dominicana lo ta disponibel riba Diamars, Diaranson y Diadomingo.
AAA su Chief Commercial Officer, Sra. Barbara Brown tabata contento pa yama e aerolinea Dominicano bonbini: “Cu e buelo nobo ofreci pa Air Century, nos por ofrese nis pasaheronan mas opcion di calidad pa y for di Republica Dominicana y pa e otro destinacionnan den e region di Caribe. Nos ta spera di por conta riba un relacion extensor cu lo desaroya den mas frequencia den futuro.”
Air Century ta ofrese buelonan charter y otro servicio den e region di Republica Dominicana, Caribe, Sur America y Noord America. Por cumpra ticket pa biaha na www.aircentury.com of na e agencia di biahe di bo escogencia.
