Fundacion Telefon pa Hubentud Aruba ta un di e tiki organisacionnan na Aruba cu ta zorg tur aña pa duna diferente training na su empleadonan. Pa medio di e trainingnan aki, e boluntarionan ta ser equipa y ta keda up to date y por duna un servicio di calidad na nos mucha y hobennan di Aruba.
E personanan cu ta contesta e telefon na Telefon pa Hubentud Aruba ta personanan cu kier haci algo positivo extra pa e mucha y hobennan di Aruba. Nan ta inverti tempo y energia den nos muchanan di Aruba. Despues di a sigui un curso basico pa por scucha y yuda nos mucha y hobennan, durante aña e boluntarionan ta ricibi minimal dos otro training grandi. Ariba 23 di juni ultimo e boluntarionan a participa na e ‘Deskundigheidsbevordering dag’ 2018;’E muchanan di awendia’. E training a start pa 9:00 di mainta y a termina pa 4:30 di atardi.
Durante e ‘Deskundigheidsbevordering dag’ 2018;’E muchanan di awendia’ a para keto ariba e celebro di e hoben, ‘Hechting’ y ‘Gewetensontwikkeling’, y diferente terminologia criminologico tocante comportacion di hoben. E profesionalnan local cu a duna informacion na e boluntarionan tawata: Meliza Lopez MSc, drs. Johnny Boekhoudt y drs. Ruthlyn Lindor.
Na e manera aki Fundacion Telefon pa Hubentud Aruba ta zorg pa e ayudo brinda na nos mucha y hobennan ta di un calidad halto. Fundacion Telefon pa Hubentud Aruba ta kere den inverti den su empleadonan. Asina aki ta zorg pa nan tin e competencia relevante y ta up to date cu locual ta trata mucha y hoben.
