Home » Dakota ta campeon di Aruba Division Honor 2017-2018 despues di a gana Nacional 4-2

Dakota ta campeon di Aruba Division Honor 2017-2018 despues di a gana Nacional 4-2

by Admin
0 comment 84 views
Den un stadion Guillermo Trinidad yena cu fanaticonan, Deportivo Nacional a enfrenta SV Dakota den e di dos partido di e Play-Off Final, despues cu e ekiponan a empata na cero gol den e prome wega. Si tin un ganado den e wega aki nan lo automaticamente corona campeon di Aruba su Division Honor, si en caso cu tin un empate esey lo forsa un di tres wega.

 

E wega a cuminsa cu Dakota circulando y tokando e bala combina cu algun yegada bastante skerpi, pero toch asina mes remarcablemente tabata cu tres hungado so, lagando tur demas atras den nan posicion, contrario di loke a spera di Dakota, unda nan sa ataka den blok, e delanterona ey tabata press halto en combinacion cu nan medio campo ofensivo, e biaha aki a opta pa mas disciplina patras entre defensa y volante di contencion, esaki tabata traha, paso Nacional en cambio no tabatin salida, por lo menos pa e prome 20 minuutnan di e prome tempo no! E clave den e tactica tempran aki di Dakota tabata pa e delanteronan Robert Francis, Ricky Hodge y Fernando De Sousa hasi hopi pressing combina cu e defensa di zona atras, un strategia cu lo bay duna fruta.

 

Na minuut 9 caba Francis (Killer), cu a pone hopi presion dilanti den ofensiva y defensiva, ta los un tiro cu ta dal den tubo di Nacional y na minuut 14 Dakota ta anota e promer gol di wega den pia di de Sousa cu a haya su mes liber na banda drechi net na rand den area penal y ta fusila portero Jose Cruz pa bay ariba 1-0. Despues di e gol nos a spera cu Nacional lo cuminsa domina bala pero tabata mas bien Dakota cu a sigui cu presion y den atake pero si cu menos precision cu anteriormente, prome cu e gol a cai.

 

Ta te na minuut 24 e Dragonan finalmente a coi nan ritmo cu mas salida y yegada awo, Dakota tambe debi na nan imprecision y slordigheid y den un di e momentonan ey mes Devis Oliveros, cu por hasi hopi cu poco, a laga atras e defensa, cu tabata solido te n’e momento ey, y no a perdona pa hasi e wega 1-1.

 

Dakota eynan a perde nan disciplina tempranero cu a dunanan dominio di bala y wega, awo ta Nacional a tuma control di e wega mientras cu e punteronan di Dakota a cuminsa perde posesion di bala much liher.
Ta bandi minuut 41 cu Dakota a bolbe cai den un ritmo atrobe y wantando y protehiendo e bala miho, haciendo e wega mas pareu y di banda pa banda. Pero, t’asina mes halftime ta bay aden empata na un gol pa banda.

 

Den e di dos tempo e Abehanan a cuminsa cu e bon ritmo atrobe di e prome mita di e prome tempo, cu bon iniciativa y na minuut 51 caba nan ta haya un tiro liber riba hala drechi despues di un pase largo di Liomar Croes pa de Sousa cu a ricibi falta riba dje. E tiro liber un minimo di 25 meter for di e porteria di Nacional a wordo cobra pa Ricky Hodge cu a mande stret pa gol na unda su companjero Ezra Bosnie ta crusa dilanti portero Cruz, distrayendo e situacion, pero ta laga e bala cu a pika keda lora bai den gol pa hasi e wega 2-1 pa Dakota.

 

Atrobe Dakota ta sigui atakando despues di e gol, algo diferente atrobe den e wega aki, sin duna Nacional chens pa arma atake, pero Nacional siendo Nacional ta forsa nan mes toch y ta coi posesion di bala for di minuut 55, Dakota lo a cai atras un poco purbando di defende e anotacion aki, pero toch un poco tempran pa hasi esaki contra un ekipo mane e Dragon nan.

 

Cu mas dominio di bala di Nacional awo toch ta Dakota cu a logra haya un tiro liber atrobe na minuut  61 despues cu Liomar Croes, cu a gana hopi bataya den medio campo den e wega aki, e biaha aki ganando un bala for di Valdo Leocadio y despues riesgando su mes curpa, pa e falta na su fabor. Tiro cobra pa Ezra Bosnie cu a pone e bala riba gol unda portero Cruz ta rechaza, bala ta bay den pia di Shermar Monticeuex na rand di area penal ta “shoot” y bala ta dal den tubo bin afo atrobe riba pia di Fernando de Sousa cu un chalaka cu su lomba full pa gol ta deposita e bala aki den net pa hasi e wega 3-1 pa Dakota.

 

Dakota ganando 3-1 ainda no tabata sigur di un victoria, prome ta mucho tempran, y dos, bo ta hungando cu un ekipo hopi duro mes mane Nacional.
Asina mes, e Norteronan a bay den atake pa busca gol, y nan a sali cu hopi forsa. Dakota a mane trek bek den defensa pero temporariamente, paso nan a tira toch bek den atake, e wega awo cu tension y di banda pa banda, un wega frenetico! Nacional a purba hopi y ta logra corta bentaha na minuut 79 cu un gol di nan capitan Valdo Leocadio for di un pase di cabes di Kenroy Ranger, hopi tabata sigur cu awo tur cos por pasa, paso un gol mas e wega lo empata y asina forsa hasta un di tres wega decisivo.

 

E wega a sigui ‘frenetico’ y momentonan di tension, nerviosismo y hopi passion, pero tambe hopi duro. Wega a bay un poco for di man apesar di un solido arbitrahe riba e anochi aki. Den tur esey Dakota ta casi comete un autogol, casi e wega ta empata na minuut 80. Wega ta sigui di banda pa banda apesar cu Dakota tambe kier a sinta patras warda, pero cu Nacional bo no por warda, nan lo saka probecho sigur! Dakota a opta pa sigui sali y ataka, locual ta nan miho defensa toch. Pa e siguiente 10 minuutnan Nacional a pusha dilanti, wega a bira duro, Dakota tambe tabata hayando manera pa contra ataka y nan a haya nan gran chens na minuut 90+4 den un escape di Shermar Monticeuex pasando e bala pa Fercand Sophia na man robes, y na su turno ta crusa e bala den “doelgebied” hayando Joel Balentien habri, cu no a pordona y a hasi e wega 4-2 pa e Dakoteronan.

 

E wega cu en general tabata hopi bon pa mayoria di tempo a bira duro y onsportief den e ultimo minuutnan, situacionan fastioso, pero, no ta kita afo con bon e play-off final aki tabata. Dakota a mantene e anotacion y a titula campeon di Aruba despues di 23 anja, bon mereci, contra un ‘ekipazo’ cu ta Nacional, ta masha poco por gana nan, Dakota a logra e hazanja aki, “no cabe duda”. Pabien na Dakota cu e titulo di campeon, pabien na Nacional cu e subcampeonato. Nos ‘Man of The Match’ ta Lionel Croes cu a domina awenochi den medio-campo y a gana casi tur su batayanan individual tambe, efectivo cu bala y sin bala.

 

Pabien Aruba y pabien Dakota, campeon di Division Honor 2017-2018.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio