Parlamentario Howell ta lamenta cu Rocco Tjong ta duna e Gabinete Wever-Croes un brevet van onvermogen

Parlamentario Alan Howell a comenta riba e tema di Serlimar, cual ta uno cu ta hayando hopi atencion na e momentonan aki. Den e cuadro aki e por a tuma nota di declaracionnan di su colega Rocco Tjon cu a bin cu algun punto, cual e ta den su pleno derecho pa presenta, pero cu den su declaracionnan ta parse cu el lo a duna Gabinete Wever-Croes un brevet van onvermogen of miho bisa un dikke onvoldoende.
Howell ta opina esaki pasobra for di momento cu e minister en cuestion a sali ta splica pueblo riba e tarifa, el a bisa bon cla con a yega na esaki. E minister no a chupe fo’i su duim anto presente. E tarifa a wordo trata y palabra den Conseho di Minister. “Un tarifa asina no ta bay sali di un dia pa otro di un minister so, e ta un maneho cu a wordo trata den Conseho di Minister. Mi ta puntra mi mes con ta posibel cu e parlamentario por duna su mesun gobierno, su mesun Prome Minister un brevet van onvermogen”.
Un biaha mas e Parlamentario di POR a bisa cu e tarifa aki a wordo trata y aproba den Conseho di Minister, y tur hende sa cu Gabinete Wever-Croes ta consisti mayoritariamente di ministernan di MEP. Ta un total di 5 minister ta representando MEP den Conseho di Minister y pa e maneho aki por a pasa mester a conta cu aprobacion di mayoria.
Mientras esaki ta tuma lugar, Sr. Tjon ta bin dilanti cu un declaracion como si fuera cu e gobierno no ta wordo maneha drechi. Segun Alan Howell Otmar Oduber su so no ta gobierno. Gobierno ta 8 minister. “For di momento cu bo tin e 8 ministernan aki ta aproba e maneho aki, e ta conta pa gobierno completo”.
Di su banda, Alan Howell ta kere cu e Prome Minister no mester haya un brevet van onvermogen pa su maneho y cu ora a trata e tema aki den Conseho di Minister a trate pensando riba bienestar di pueblo.
Si pueblo no ta di acuerdo cune, esey ta un otro discusion y eynan si Alan Howell ta duna su colega Rocco Tjon tur rason, ya cu e tin tur e derecho como parlamentario pa yama un minister pa duna cuenta durante un reunion publico na bienestar di pueblo.
Mas aleu, Alan Howell a indica cu e ta e presidente di Comision Fiho di Medio Ambiente di Parlamento y regularmente Minister Otmar Oduber ta acudi na Parlamento pa duna update di loke e ta bezig cune y loke ta su vision y mision. Varios biaha e ta splica kico ta su plannan, kico e ta bay bin cune y con e ta bay bin cune. Kisas berdad Minister Oduber den e reunionnan aki no a duna un fecha y tarifa specifico, pero no por haci manera cu e tabata un gran sopresa.
Howell ta añadi na esaki cu ta hopi straño pa tende cu e maneho aki a bin como un sorpresa, pasobra si ta su mesun partido a aprobe den Conseho di Minister, e lo mester por tabata na altura. Si esaki no ta e caso, e ora Fraccion di MEP por ta lo por tin un falta di comunicacion.
Como lider di Fraccion, Rocco Tjon tin diferente acceso na Prome Minister:
Como lider di Fraccion mes
Como parlamentario
Como miembro di patido MEP den conseho di partido.
Asina aki Alan Howell kier mustra, cu ta imposibel cu e decision cu gobierno a tuma a bin como sorpresa.