Medidanan cu gobierno a impone riba pueblo, ta innecesario ya cu pa ocho aña largo partido MEP den oposicion a papia continuamente riba mega debe, caminda a bisa cu nan gobierno lo tin un solucion pa bin c’un plan economico, un plan financiero, con pa financia e situacion financiero di gobierno sin ningun medida, y prome cos como gobierno cu nan a haci, ta di lanta un comision cu mester bay studia con pa traha un plan.
Benny Sevinger di fraccion di AVP mustra cu pa ocho aña largo a gaña pueblo cu nan tin un plan y awor nan tin comision pa tur cos y tambe pa un plan financiero, pues cu otro palabra MEP a gaña pueblo durante di eleccion.
“Riba dje gabinete Wever Croes a dicidi di tuma e cos di mas facil pa haci, cu ta introduccion di un pakete di medida, pues pasa e rekening pa comunidad sin cu a haci un esfuerso pa trece un desaroyo economico pa trece placa den caha di gobierno pa medio di desaroyo economico, dor di trabou dor di produci pa pais Aruba.
Tur esaki sin cu gobierno a bay corta gastonan cu nan a priminti pueblo cu nan lo haci, al contrario por mira cu ocho minister hunto c’un staatssecretaris ta costando mas cu e nuebe ministernan di gobierno di AVP.
Gobierno a bisa cu e medidanan ta pa paga debe pero ora cu mira cu nan ta bay cuminsa na chica mas cu 140 miyon for di pueblo anto na otro banda gobierno ta hisa e gastonan cu mas cu 130 miyon den bo presupuesto, esey kiermen cu e placa cu ta ranca for di pueblo cu medida, ta net pa tapa loke bo gobierno a pone extra riba presupuesto.
Ningun cen ta bay pa paga ningun debe, mucho menos pa paga pa proyectonan PPP, pasobra esakinan cu nos ta pagando aworaki, tabata riba presupuestonan caba for di 2015 pa 2017 y al contrario, gobierno di AVP a paga proyectonan PPP di gobierno di MEP for di 2010 te cu 2017 sin cu nos a keda, sin cu nos a tuma medida, sin cu nos a bay bisa cu e proyectonan PPP di MEP a crea un buraco den presupuesto di pais Aruba.
Bou di ningun circunstancia por tin hustificacion pa gabinete Wever Croes impone un pakete di medida di e drastico aki, causando problema serio pa henter comunidad, creando situacionnan economico sumamente delicado y pa colmo sin por hustifica kico ta bay haci cu tur e placa cu nan lo ranca for di pueblo.
Ainda ningun hende sa kico e gobierno aki ta bay haci, kico ta su plan y cual ta su vision pero unicamente nos por tuma nota cu a bisa pueblo cu e tin cu saca placa pa yuda un gobierno cu no sa kico e ta haci, cu no haci kico ta su vision y solamente kier mas placa den caha pa mira con nan mes ta bay uza e placa aki.
Diamars anochi siman pasa, e publico grandi cu a acudi na nos anochi di informacion, a mustra nan disgusto, a mustra nan inkietud pa tur loke ta tumando luga ya cu net for di un gobierno cu a priminti cu e lo no tuma medida contra pueblo, a bira e enemigo grandi di pueblo caminda nan lo bay causa pa un situacion hopi delicado den proximo lunanan cu ta bin.
Nos por a tuma nota cu pueblo a cuminsa fada, cu pueblo ta dispuesto pa Sali y mustra gobierno cu nan lo no acepta loke ta tumando luga y cu nan ta dispuesto pa bay mustra gobierno tambe nan disgusto grandi cu nan tin pa un gobierno sin pieda cu tin awor aki,” Parlamentario Benny Sevinger a mustra.