ORANJESTAD – ‘WEB Ringleiding 2’ lo conduci na un suministro confiabel y apto pa futuro desaroyo di Oranjestad, e zona di Low Rise Hotels y futuro desaroyo den cercania di e avenida. Asina CEO di WEB Aruba, Luis Oduber, a informa diabierna ultimo durante e ceremonia di Groundbreaking na Wayaca. Ta trata di inicio di e proyecto pa instala tuberia nobo den un trayecto di 7.7 KM. E acto di Groundbreaking a keda den man di Minister Chris Romero, representando Minister President Evelyn Wever-Croes pa e ocasion aki, hunto cu gerencianan di WEB Aruba y contratista principal Arubaanse Wegenbouw Mij. Mirando e desaroyo den nos infrastructura actual cu e proyecto di Watty Vos Boulevard, WEB Aruba a dicidi di haci uzo di e oportunidad pa amplia su red di distribucion di awa paralelo cu e proyecto di Watty Vos Boulevard.
E proyecto WEB Ringleiding 2 ta cuadra cu WEB Aruba su strategia continuo pa ofrece, den e caso aki Awa, na un manera Confiabel, Pagabel y Sostenibel. Lo instala un tuberia di 300 mm (12 “duim”), na Wayaca na haltura di aeropuerto y termina riba e tuberia existente banda di e edificio di Sun Plaza na Playa.
Infrastructura complica
Den pasado a busca diferente ruta alternativa pa reemplasa e tubo existente cu ta suministra e area di Oranjestad y e Low Rise Hotels. Ta trata aki di un ruta cu un infrastructura complica, lo cual a trece tardansa den realisacion di proyecto. Mientrastanto, e peticion pa saca e tanki di awa riba tereno di waf na Oranjestad for di servicio a haci e reto ainda mas grandi. WEB lo inverti 4.9 miyon florin den e proyecto aki, cual lo tin un duracion di 7 pa 8 luna. Ta planea pa pone WEB Ringleiding 2 den servicio den e prome kwartaal di 2019.
Den fase
E contratista cu lo ehecuta e trabou aki ta Arubaanse Wegenbouw Maatschappij bou di supervision di e team di Distribucion di awa di WEB, cu lo traha hunto cu entre otro DOW, Surveying Unlimited Aruba, ELMAR, SETAR y Proyecto Watty Vos Boulevard. Lo ehecuta e proyecto den diferente fase y WEB lo avisa via media e inicio di cada fase. Lo cuminsa cu e proyecto den e area patras di Madiki Kavel pa Ponton.
Durante e ceremonia e director di WEB Aruba a pidi comunidad for di awor aki caba comprencion y a pidi disculpa pa tur inconveniencia cu e proyecto di instalacion di tuberia trece cu ne pa habitantenan. El a finalisa cu un palabra di danki y exito na team di sector di distribucion di awa di WEB Aruba y tambe na e teamnan di Arubaanse Wegenbouw Maatschappij, DOW, Surveying Unlimited Aruba y tur otro envolvi.
Donacion
Manera acostumbra, pa celebra inicio di proyectonan nobo, WEB durante e ceremonia di groundbreaking a haci un donacion pa asina contribui na un comunidad sostenibel. Hunto cu contratista principal Arubaanse Wegenbouw, WEB a haci un donacion di Awg. 5.000,- na SV Brazil Jrs. pa contribui na transporte di e muchanan pa training y weganan di futbol. E di dos donacion di Awg. 5.000,-
a bay pa Fundacion pa Nos Muchanan. E fundacion aki ta duna guia y educacion na mayor y lidernan di mucha di diferente edad.