Hedging – Negoshi di Tereno – Hospital – Negoshi di Permiso
Awor cu pueblo a cuminsa paga pa e maneho iresponsabel di Gobierno anterior, ta turno pa pone esnan cu a causa e desastre financiero, para responsabel.
Gobierno di Aruba a informa cu tin varios investigacion ta andando riba Gobierno anterior di AVP.
HEDGING
E investigacion riba cuanto placa a bay perdi den “hedging” y ken ta responsabel pa esaki, ta andando. Aki e enfasis ta pa compronde ken ta esnan cu a tuma e decision di hedge na prijsnan ridiculamente halto poniendo cada cuidadano di nos pais paga un prijs dobbel mas halto cu mester ta. E investigacion ta compleho y ta tuma tempo debi na contactnan cu mester tin den exterior. Desde awor caba por bisa cu ex minister Mike de Mesa tabata tin un papel importante den e desaster aki. Si Gobierno di AVP no a tuma e decisionnan descabeya e tempo ey ora prijs di crudo a baha te na recordnan mundial, awe lo tabata tin hopi mas espacio pa baha prijs di awa y coriente. Lamentablemente awor e prijs di crudo ta subiendo. Asina mes Gabinete Wever-Croes ta determina pa baha e prijs di awa y coriente.
NEGOSHI DI PERMISO
Contrario na loke hopi a pensa, aparte di e caso di Paul, investigacion ta continua riba esnan cu ta complice di otronan den e negoshi ilicito aki. Pasobra un cos ta sigur. Ex Minister Paul Croes ta corupto, pero e no ta e unico di Gobierno di AVP cu ta corupto. Indicacion fuerte ta cu ex minister Benny Sevinger tambe a hunga un papel importante den e casonan di corupcion. Mientras tanto tur medida ta wordo tuma pa e corupcion aki no pasa nunca mas.
NEGOSHI DI TERENO
Fraccion di MEP a entrega keho den e negoshi aki. Pero aparte di esey tin tambe investigacionnan interno tumando luga pa haya sa exactamente ken tur ta involucra, entre otro e papel di sra. Leoncita Arends. Tur esaki lo yuda agilisa e investigacion penal.
HOSPITAL
E proceso ta andando pa apunta un ‘projectleider’ nobo pa finalisa e proyecto y pa asina e investigacion por cuminsa riba tur e corupcion den e proyecto. Entrante otro aña mester cuminsa paga 80 miyon florin adicional cada aña na e proyectonan di PPP. E tristo ta cu den e 80 miyon aki ta hopi placa ta bay na ladronicia di esnan cerca di e gobierno anterior.
Gabinete Wever-Croes a asumi e responsabilidad pa drecha e situacion di nos pais. Pero den e proceso aki no por lubida esnan cu a causa e desastre nan cu awe pueblo mester paga p’e.