Despues cu recientemente Fraccion di MEP den Parlamento a tuma nota den prensa cu Serlimar Sui Generis – un compania cu ta resorta bao responsabilidad di Minister di Infrastructura y Medio Ambiente y cual compania ta encarga cu recogemento y procesamento di sushi – lo mester bay paga un cierto suma pa cu e recogemento aki, lider di fraccion sr. Rocco Tjon MBA haciendo uzo di articulo III.17 di Staatsregeling y articulo 59 di Reglement van Orde di Staten di Aruba y na nomber di Fraccion di MEP a manda un carta cu e siguiente peguntanan na e minister concerni:
- Minister por informa nos fraccion tocante di e maneho aki?
- Minister por suministra nos e documentacion necesario cu ta hustifica e decision aki?
- A ser haci un investigacion cual ta e consecuencianan cu e decision aki tin pa e ciudadano?
- A ser haci un investigacion cuanto lo ta e entradanan anual pa loke ta e decision aki y con esaki ta relaciona cu e presupuesto cu a ser aproba caba?
- Pakico ta necesario pa cobra un suma si den e presupuesto caba sumanan extra a ser aloca, hustamente pa paga pa e recogemento y procesamento di sushi na 2018?
- E declaracionnan di minister tocante e topico aki ta referi na 2018?
Riba pagina 6 di e dos nota di cambio bao di cabes 034 Reiniging, post 4300 Goederen en Diensten, specificamente ta ser bisa “de dienstverleningsovereenkomst met Serlimar Sui Generis voor het ophalen van vuil en verwerken van afval voor 2018 bedraagt 22 miljoen waardoor de post Overige Uitbestedingen ten behoeve van Serlimar Sui Generis met Afl. 5.378.800 aangevuld dient te worden”. Esaki ta conduci na e siguiente preguntanan:
- Ta corecto cu a tene cuenta caba cu e pago di recogemento y procesamento di sushi pa 2018 den e presupuesto cu recientemente a ser aproba?
- Si no ta asina, na kico e suma adicional di Afl. 5.378.800 lo wordo uza?
Den e Nader rapport relaciona cu e presupuesto, gobierno ta indica lo siguiente:
“Vanwege de gaande discussies alsook de onduidelijkheden met betrekking tot het innen van gelden door Serlimar, draagt het Land vooralsnog bij voor ophaaldiensten bij de particuliere huishouden”.
- For di locual ta describi aki riba, suscrito ta comprende cu gobierno, pa loke ta concerni presupuesto 2018, ta contribui cu e servicio di recogemento di sushi na e casnan particular ya cu e discusion tocante cobramento pa cu esaki ta andando ainda, esaki ta corecto?
- Si esaki ta corecto, pakico ta desvia awo di e intencion di maneho aki manera indica den e Nader rapport?
- Minister ta di acuerdo cu e decision aki a trece cu ne hopi conmocion den comunidad y tambe circunstancianan extra pisa pa e ciudadano?
Te aki e preguntanan cu Fraccion di MEP a manda pa Minister di Infrastructura y Medio Ambiente.