Cumpra pisca cerca piscado local semper ta mas miho y mas dushi
Dia di piscado, oficialmente ta dia di San Pedro, 29 di juni, pero Centro di Pesca Hadicurari conhuntamente cu Santa Rosa pasa un kwart siglo ta celebrando esaki riba e diadomingo prome of siguiente cu piscadonan y pueblo di Aruba. E aña aki e fecha ta diadomingo 1 di juli awor. Un biaha mas lo tin e tradicional torneo di pesca y atrobe Hadicurari lo ta poniendo atencion riba seguridad riba lama pa nos piscadonan, como tambe fomentando mas solaridad pa cu e lucha di nos piscadonan. Bo tambe ta invita pa esaki.
Hopi actividad:
E celebracion ta consisti di un torneo di pesca unda piscadonan for di 4’or di marduga ta subi lama y prome cu 3’or di atardi lo ta yegando tera pa pisa nan pisca y bende cu public presente durante di e dia di famia y festival di cuminda di lama cu lo ta tuma lugar na e beach dilanti di e centro na Palm Beach. Lo tin varios tent ofreciendo delicianan di nos lama, un bar crioyo a la piscado cu damasnan nita nita y ambiente sin igual. Lo tin musica di DJ “Ora pa Bailadores” y lo finalisa e anochi cu musica en bibo di “Jeo 297”.
Benta di Pisca Fresco:
E punto culminante ta e pisamento y bendemento di pisca fresco fresco. Pa esaki e centro ta pone un tent apart specialmente asigna pa den e mesun tradicion di nos antepasadonan cu a biba largo comiendo cuminda fresco cumpra for di piscado na beach. Ki motivacion mas bo mester tin pa bin? Pisca ta un di e fuentenan mas nutritivo y saludable pa ser humano. Pisca fresco, gara den e awanan di bon calidad rond Aruba, semper ta mas miho y cu mihor sabor. Pesey reserva e fecha pa abo tambe pasa busca bo pisca fresco y gosa di e festividadnan. For di 11’or te 6’or di atardi na Centro di Pesca Hadicurari, un y tur lo pasa un rato ameno canto di lama.