Diahuebs atardi, Prome Minister a efectua e apetura di e 31 campeonato di natacion di CCCAN. Mas di 500 atleta di Aruba y di 24 pais bisiña di region Centro America y Caribe a participa. Na e ocacion aki, Premier Evelyn Wever-Croes a duna un discurso felicitando e comite y e atletanan cu un Campeonato asina importante. Prome Minister a reemplasa Minister di Turismo, Salubridad y Deporte kende no por tawata presente pa motibo di compromiso di trabou den exterior.
Esaki ta e prome biaha cu Aruba ta e anfitrion di e campionato di natacion CCCAN. Esaki ta duna Aruba e oportunidad pa mustra nos bishitantenan nos facilidadnan di deporte como tambe pa Aruba por disfruta di un competencia di e nivel halto aki di deporte. Y e biaha aki, Aruba tin e oportunidad pa apoya nos landadonan y e landadonan sincronisa kendenan regularmente ta gana titolonan importante den competencianan internacional.
Prome Minister a bisa den su discurso: “Deporte no ta solamente tocante competencia. Deporte ta tocante dedicacion, disiplina, trabou duro, compormiso, excelencia, trabou di ekipo, respet pa otro y mas cu tur, deporte ta tocante Amistad. Mi ta desea boso tur un competencia exitoso y placentero. Mi ta desea tur bishitante un bon estadia riba nos dushi isla. Pabien cu e di 31 campeonato di natacion di CCCAN”.