Final di Division Honor entre Nacional y Dakota a cuminsa pero sin ganado ainda despues di un prome wega solido

Den cuminsamento di wega Nacional tabata protagonista di biaha, tirando den atake, contrario cu nos tin custumber di wak ora cu e dos ekiponan aki enfrenta otro, unda cu Dakota sa tira den atake prome husando nan bentaha den velocidad, pero Dakota e biaha aki tabata esun cu a warda pa wak kiko pa hasi pa counter e iniciativa di Nacional.

Dakota tabata tambe un poco impreciso y timido, faltando ritmo sustantivo den e prome parti di e prome tempo. Nacional en cambio si tabatin yegadanan tempran y skerpi, manera esun di Kenroy Ranger na di seis minuut caba, unda ela haya un pase di Valdo Leocadio pa penetra y haya su mes dilanti portero Lionel Kaarsbaan di Dakota cu a sali manera un pantera pa salba su ekipo di un gol tempran. Toch net despues di e mesun hugada ey Dakota a tira den contra golpi unda Fercant Sophia a haya su mes cu un bon chens di gol despues di e “fast- break” cu e mes a protagonisa en conhunto cu Fernando de Souza den un accion relampago penetrando den e linea mei mei di e Dragon nan, algo inusual, Fercant su cabesazo tabata na banda di gol.

Te cu minuut 20 ainda Dakota tabata bastante eratico den nan ofensiva pero en cambio nan tabata hopi solido den e wega sin bala y nan defensiva. Dakota cu tur e bon trabou cu nan tabata haciendo y cu menos ofensiva nan toch tin tendencia ainda di momento bira un poco slordig unda cu sa perde bala mucho facil, no necesariamente debi na e acoso di Nacional pero hopi biaha debi nan mesun foutnan, mane por ehempel hasi pase largo sin niun hende dilanti of transporta mucho mientras cu por a pasa, busca e homber liber etc. Nacional ta un ekipo hopi metodico y economico, nan no ta perde bala pa loco, y poco fout mental, of casi nunca.

Ranger, mei mei di un bataya individual intenso cu Paul Nickenson di Dakota, atrobe cu un bon atake pa Nacional cu un tiro peligroso na minuut 12, pero e bala ta bay na banda. E duelo ey tabata mayoriamente gana pa Nickenson awenochi, pero, ta un paar di biaha cu Ranger los for di e “decking” aki e ta sumamente peligroso.

Na minuut 16 ora cu Dakota a logra haya su ritmo y a cuminsa haya yegadanan mas skerpi tambe, Ricky Hodge ta haya un bon pase di Robert Francis na rechts mientras cu Robert mes a core bai den area penal pa ricibi e pase bek di Hodge pero ta faya cu su cabesazo. Otro yegadanan di alta calidad di Nacional na minuut 19 ora cu Jean Pierre Heyden a ‘drible’ bay laga tres pa despues no haya niun companjero liber den area penal, y despues e atake di Dakota na minuut 20 ora cu Hodge a saka un tiro net pafo di area penal cu a bay net na banda di palo di gol. Tambe e tiro di Valdo just un paar di minuut despues y hopi otro mas. Un wega bunita di ‘toma y dame’ te cu halftime a yega cu e marcador 0-0, pero un dushi 0-0 por cierto.

Den e di dos tempo Nacional a cuminsa atrobe cu miho posesion di bala y atakando di biaha sin basila, e biaha aki si Dakota a sabi di responde mas lihe cu nan mesun counter, asina na minuut 49 Dakota a haya nan mihor chens den e di dos tempo, un dobbel chens por cierto, ora cu Fernando de Souza a penetra na banda drechi di doelgebied pasa bala den ‘area chika’ unda cu e bala a pasa hopi pia pa despues Robert Francis crusa bek den candela riba cabes di Ricky Hodge cu a bay net na banda.

E wega ta sigui cu mas pentracion di Nacional pero toch ambos ekipo cu nada di peliger grandi. Despues di minuut 64 e wega tabata di banda pa banda cu hopi velocidad, cu poco precision, vooral Dakota cu sa perde e bala hopi facil ainda, Nacional si ta sigui mas skerpi y economico den nan hugadanan, e disciplina di Nacional ta hopi significativo. Dakota tambe a sorprende den nan “approach” den e wega, cu hopi concentracion y bon temperamento, algo cu di berdad a hasi nan mas potente. Despues cu Nacional a perde Edward Clarissa pa lesion na minuut 72, nan a mane perde nan bentaha riba hala drechi unda cu Clarissa ta imponente, pero e bon ta cu ainda Nacional tabatin Jean Pierre Heyden, cu ta crucial pa nan salida riba hala robes, tin biaha di hopi patras, y Heyden sa distribui e bala hopi bon, of e mes sa subi pa ataka tambe, por cierto Nacional su miho hungado awenochi.