E minister di Medio Ambiente a informa parlamento den un reunion di e comision fiho di Medio Ambiente encuanto su maneho pa cu desperdicio. Sr. Vrolijk, miembro di parlamento, kier crea e impression di a baha pisa riba e minister, pero na final di cuenta mester constata cu a simpelmente a doblega pa e minister. Sr. Vrolijk p.e. no a bisa nada concreto cuanto e “sprookje” di Otmar Oduber lo bay sali nos pueblo y cuanto e “kartelheffing” lo bay ta.
Sr. Vrolijk un biaha mas ta cuminsa na bisa, cu eigenlijk e reunionnan di comisionnan fiho mester ta publico. Esaki sigur ta un tremendo idea, pero pakico warda anto. Esaki ta masha facil pa haci. Djis mester cambia e Reglamento di Ordo di Parlamento y ta “des Staten”!! Un articulo ta cambia, anto ta cla. Y si kier ta mas completo y pa un democracia mas bibo y mas
cerca di e ciudadano, por regla tambe cu pueblo lo por haya un oportunidad pa haci pregunta. Ban spera cu pronto e cambionan wordo proponi y alabes acepta, pasobra asina e tipo di reunionnan aki ta keda un “onderonsjes”, sigur tambe ora cu oposicion den Parlamento ta scohe pa no tey.
Por bisa cu for di e palabranan di sr.Vrolijk, nos por a saca afo cu ta obvio cu Otmar Oduber ta mete cu e asuntonan diario di Serlimar. Y esaki ta bay completamente contra e “Landsverordening Instelling Servicio di Limpieza Aruba” y contra e espiritu di e ley aki.
Na prome lugar den articulo 4 inciso 2 ta poni cu ta e director ta representa Serlimar
“in en buiten rechte”!! Nos no sa si sr. Vrolijk a lesa e ley aki, pero e ta cla y raspa ey den.
Ta poni hopi cla tambe cu e minister NO mag di mete den e asuntonan diario di e compania. Esaki ta para den articulo 13 di dicho ley. Den e articulo ta poni cu e minister concerni por duna “aanwijzingen van algemene aard”. Pues mas cla e no por ta.
Asina tambe mi a actua tambe como minister e tempo ey. Serlimar tabata tin un solo director
capaz, serio y integro cu a sa di a maneha Serlimar debidamente y tabata por a conta cu mi
confiansa pa 100%, sin cu mi mester a mete den e asuntonan cu ta regarda Serlimar.
Sr.Vrolijk a bisa tambe cu ela bisa Minister cu segun e, e edificio na Pos Chikito mester un “hindervergunning” y “doodleuk” minister a bise cu no paso antes no tabata tin mester, dus awor tampoco. Y ta parce cu e pilder aki a wordo guli tambe. Ta straño cu poco tempo ey, cu razon of no, a para un cobamento di tereno pa saca santo siendo aki tambe esaki tabata sosode pa masha hopi aña caba. Y e motibo cu a wordo usa ta cu algun bisiña a reclama. Dicon den e caso aki, no a tuma un poco tempo pa puntra e bisiñanan si nan tin obheccion pa un Centro di Reciclahe bin den porta di nan cas? Y Serlimar na San Nicolas tampoco nunca no tabata tin “hindervergunning”, dicon anto mester a sake di eynan?
Un otro parti cu a hala nos atencion ta unda sr.Vrolijk ta bisa cu minister lo ta di opinion, cu door cu Serlimar ta un Sui Generis, e lo por cera combenionan, y sin tene cuenta cu reglanan di Good Governance, esta reglanan di destaho publico, transparencia etc etc. Wel atrobe
nos ta ripara cu ta guli manda abou aki.
Nos kier a mustra atrobe cu si a bay busca pa sa mihor, mesora por a saca afo cu e minister aki un biaha mas ta gaña y manipula pa e por sigui cu fixmento di dealnan y pa yena saco di financistanan di campaña. Den articulo 7 inciso 3 ta para un biaha mas cla y raspa, cu tanto e
director como e Hunta di Supervision di Serlimar MESTER actua conforme loke ta poni den e raport di e comision hulandes “Corporate Governance” di december 2003. E articulo aki ta implica claramente cu e minister no tin un “donder” di haci den e asunto di e.o. huurmento di e edificio di su amigo, pero cu alabes esnan responsabel, no solamente por, pero nan MESTER actua conforme e raport ariba menciona. Cu otro palabra ta e DIRECTOR ta responsabel.
E scorpion ta asina venenoso, cu e sa cu si mayan mester bay tras di esnan cu
legamente ta responsabel, no por bin cerca su persona, pero mester bai prome cerca e director(nan) y alabes cerca e Hunta di Supervision. Cu otro palabra: “Een gewaarschuwd man, telt voor twee”!
Loke mas a resalta ta e hecho cu sr.Vrolijk constantemente ta bisa cu “na final di dia ta e minister ta responsabel”. Esaki ta preocupa nos masha hopi mes. Kico esaki kiermeen? Minister por haci kico cu e kier, aunke cu esaki lo por trece mas gasto pa nos pueblo? Anto mester
accepta sin mas tur e maniobranan di e minister sin destaho publico y sin controla e “fixed bidding”?
Unda responsabilidad di parlamento ta pa para e minister cu ta manipula y haci cosnan cu no ta corecto? Parlamento su tarea ta pa para e minister aki prome cu un biaha mas e haci daño na
nos pais, cu lo tin como consecuencia na final di dia, cu ta nos pueblo atrobe mester ser hiba
na e altar di sacrificio cu pago di e “kartelheffing”!! Y esnan culpabel, mes ta keda liber, apesar di ta grita cu e minister ta keda responsabel.
Booshi Wever
Lider partido UPP
28 juni 2018