ORANJESTAD – Como e entidad di promocion y maneho di destino pa Aruba, Aruba Tourism Authority (A.T.A.) continuamente ta den contacto cu socio y stakeholders local y internacional cu e meta pa semper ta un stap dilanti den mundo di turismo y ta prepara pa atende e retonan y capitalisa di oportunidadnan den e industria. Como tal, e siman aki a realisa na New York – Merca diferente encuentro. Ehecutivonan local y internacional y agencianan cu ta traha cu A.T.A. a sinta pa pasa riba un serie di tema incluyendo aspectonan pa restante di 2018 como tambe pa 2019. Tambe a sostene un reunion cu Minister di Turismo. Probechando presencia di diferente socio a reuni tambe cu e aerolinea number 1 actualmente pa Aruba, situa na New York, JetBlue.
Ehecutivonan di A.T.A., incluyendo CEO Ronella Tjin Asjoe-Croes, CMO Sanju Luidens-Daryanani, y e ekipo di Norte America encabesa pa Area Director Ed Malone, a reuni cu Minister di Turismo y su delegacion. Tambe e reunion a inclui seccionnan cu tur agencia cu ta representa Aruba den e mercado.
Reunion cu Minister a inclui lo siguiente riba agenda, entre otro encuentro cu ehecutivonan di aerolinea JetBlue, despues a sigui cu reunion cu e agencia di mercadeo creativo pa Aruba, The Concept Farm como tambe e compania di relacionnan publico Zimmerman Agency. Ademas a sinta cu Ansira – Database Marketing y cu USIM cu ta e Media Agency.
Prome cu e reunion cu Minister, a probecha pa reuni cu JetBlue kende a confirma expansion di servicio aereo pa cu Aruba. JetBlue a cuminsa bula pa Aruba na aña 2006 cu vuelonan for di Boston. Awe, 11 aña despues, JetBlue a crece y bira un di e socionan strategico mas grandi pa Aruba, contribuyendo grandemente na nos industria turistico, percurando pa vuelo for di mercadonan clave manera New York y Boston, como tambe percurando pa mas diversificacion cu vuelo for di Fort Lauderdale. A confirma cu lo expande servicio for di e mercado di Boston durante e ultimo kwartaal di 2018, cu lo continua den 2019.
E mercado di Merca ta sigui ta fuerte. A cera 2017 cu un crecemento di 10.6%, unda tur region den e mercado a crece. Te cu mei di e aña aki e mercado a mustra un crecemento di 7%. E mercado di Merca a mustra un crecemento consistente for di 2011 en adelante, cu un crecemento averahe anual di 3%. Un crecemento di ‘Tourism Receipts’ di 6.5% pa Aruba aña pasa ta pa gran parti atribuibel na e demanda y empuhe fuerte for di e mercado Mericano.