Siman cu pasa a termina cu un reunion cu CAFT y Parlamentario Setty Christiaans-Yarzagaray a elabora riba dos punto di interes como parlamentario cu ta: 1. E ley di LAFT unda cu mester bin un cuadro di normanan nobo pa motibo cu e aña aki e ley anterior ta vence. 2. E forma of con informacion pa yega na e normanan stipula den e ley di LAFT ta wordo fabrica of manipula.
CAFT a bin Parlamento pa splica e contenido di palabracionnan cu Gobierno. CAFT a indica cu nan kier mira un ‘pad’ den finansa publico na un forma sostenibel y manehabel mirando cu esaki no tawata e caso durante cu e gobierno anterior tawata na mando. Parlamentario Christiaans-Yarzagaray ta sigui bisa cu no ta rekeri mucho experticio pa tuma nota di raport ‘State of the Economy’ di Banco Central unda cu ta indica cu ‘debt to GDP’ di 48% na 2009 a hisa na casi 90% pa aña 2017. E informacion aki ta wordo mira tambe den e raportnan di CAFT.
E Parlamentario ta bisa cu locual ta mas importante den su opinion ta e punto na unda CAFT ta conseha pa Gobierno stop di gasta asina tanto placa keriendo cu esey lo “spin off” economia cual ta locual a wordo haci durante e gobierno di AVP. Un bon ehempel di esaki ta e raport ‘Bo Aruba’ unda ta indica e cantidad di placa cu a wordo hinca den proyectonan grandinan cu ainda falta pa wordo paga y awe no por wak realmente unda e placa di gobierno a bay! E escohencia di e gobierno anterior pa un sistema di presupuesto anticyclico no a funciona. Hinca tanto placa den inversionnan sperando cu esaki lo boost e economia no a funciona.
Segun e Parlamentario, e Gobierno anterior mester a para keto y wak e resultadonan hopi tempo caba y admiti cu e metodo cu nan a uza no tawatin efecto positivo pa Aruba y mester a evalua y opta pa cambia nan maneho financiero economico. Awe, Aruba ta para cu un debe astronomico pa paga cu ta hacie dificil pa motibo di su efecto negativo riba finansas publico, sin wak cu cada mucha cu nace awe, tin debe caba di 45 mil florin riba nan cabes
Tambe CAFT ta pidi Gobierno pa dedica entradanan incidental na paga debe y no uza esaki den inversionnan cu por causa mas debe. Esaki, segun Parlamentario Christiaans-Yarzagaray ta un tiki dificil pa Parlamento acepta pasobra Aruba na e momentonan aki tin retonan hopi grandi pa resolve socialmente, economicamente y finacieramente.
Tawata bisto cu manipulacion di cifras a tuma luga den gobiernacion anterior pa purba cumpli cu norma di LAFT. Un ehempel di esaki, segun e Parlamentario, por a constata den e ‘Explotatie Rekening 2016’ unda ta indica cu den aña 2015 e gobierno anterior a pidi ‘kwijtschelding’ di 102 miyon florin for di SVb hustamente pa cumpli cu norma. Mas grave ainda ta cu SVB a raporta esaki den su jaarrekening di 2015 mientras cu pais Aruba tin esaki registra pa 2016 djis pa asina mustra cu nan a cumpli cu ley di LAFT di 1.5% di financieringstekort na 2016. Gobierno anterior door di problema financiero tawata tin e desencia di pidi SVB pa kwijtscheld e placanan cu nan a fia di SVB, sin considera e problema cu e por a causa e instituto di SVB y su aseguradonan.
Den e ronde di pregunta por escrito den Parlamento riba exploitatierekening, Parlamentario Setty Christiaans-Yarzagaray a haci e pregunta aki tambe na Gobierno actual mirando cu e ‘Explotatie Rekening 2016’ ainda mester wordo aproba den Parlamento. Gobierno ta wordo getoets basa riba e norma pa cu e sector colectivo. Sector Colectivo ta encera tanto cuentanan di pais Aruba como tambe otro organonan manera ATA, Universidad di Aruba, Serlimar y SVB.
Conforme definicion, sector colectivo ta institutonan cu ta dependiente di gobierno pa 50% of mas. CAFT ta haci nan toets riba sector colectivo y si gobierno anterior ta recuri na pidi kwijtschelding y raporte den un aña cu esaki no a ser otorga, por considera esakinan como manipulacion cu e 102 miyon djis pa “mustra” cu e ta cumpli cu norma. Si no tawata tin e suma di 102 miyon nan kwijtschelding y/of a raporta e suma aki na 2015 manera mester ta, ta dificil of casi imposibel pa e gobierno di AVP pa alcansa e normanan di LAFT na añanan 2016 y 2017”, segun Christiaans-Yarzagaray.
E Parlamentario a duna un otro ehempel unda den e raport ‘State of Economy 2017’ di Banco Central ta indica cuanto placa di subsidio na fundacionnan no a wordo paga. Esaki a causa e problemanan social cu nos ta confrontando awe. Gobierno anterior no a inverti rond di 40 miyon florin den fondonan di subsidio di diferente fundacionnan cu ta traha cu un meta social.
“Manera a bin cambio di Gobierno, e sociale veld ta e prome cu a haya atencion necesario pasobra ta for di ey e gritonan mas duro a sali pa atende cu e situacion a consecuencia di e problemanan social. E Gobierno actual tin mas fondonan riba presupuesto pa inverti den e area social, contrario cu e presupuesto di e gobierno anterior, pa atende cu e crisisplan cu Gobierno a ricibi di e veld social. Si den un comunidad no atende cu problemanan social, ta mas problemanan social so ta word crea y pesey a scohe pa compromete cu esaki,” Parlamentario Setty Christiaans-Yarzagaray a duna di conoce.