Barcadera: Diadomingo den dia mane ta custumber algun persona a dicidi di bay sambuya, nan a bay na un di e barconan cu ta gesink patras di e rif di barcadera. Nan a bay sambuya na e barco Jane C, cu ta un barco di carga grandi gesink patras di e rif di Barcadera.
E sambuyadornan tabata riba e cabina di Jane C, caminda tabata stuur e boto y diripiente un congla berde grandi a sali di abou y a bay straight na man di un di e sambuyadornan y a morde.
Mesora e sambuyador a ranca e bestia, pa e no bay draai y kibra su dede. E congla a bira bin bek y a morde e otro man, e sambuyador a bolbe ranca e congla y a cuminsa landa bay, pero e congla a bin su tras y a morde hopi mahos na su pia. Asina ela keda lucha cu e congla te ora ela yega na e boto bek y subi den dje.
Mesora nan a bay bek tera y cu auto particular e sambuyador herida a bay hospital. Ela wordo trata pa su heridanan y mester a cose nan.
E Dive site aki ta un site cu sa wordo bishita no solamente pa diversnan local pero tambe pa turista cu ta dive, especialmente advanced divers ta sambuya na Jane C, den e boto aki por mira picuda, chucho y tin ora te hasta turtuga. E congla berde aki ta biba den e boto Jane C, otro sambuyadornan y Dive Operatorsnan mester pone bon tino cu e congla berde aki na momento cu nan ta bay dive den Jane C.