Pa mustra con importante ta pa tin e personanan adecuado na e puestonan adecuado, Marisol Lopez-Tromp a presenta un carta den cual ex minister Sevinger ta indica cu lo cambia ley pa acomoda un proyecto specifico, cual ta un indicacion cla cu e no tabata capacita pa e posicion di Minister di Infrastructura.
E carta fecha november 2014 ta mustra con e tempo ey minister di Infrastructura a firma pa un proyecto di hotel. E ta un ehempel di con ta tuma decisionnan robes y pa casualidad ta trata di e proyecto di Isla di Oro. Ex minister Sevinger apart di a duna su sosten na e proyecto, e ta bisa cu e lugar unda cu e proyecto aki lo mester wordo ubica mester cuadra cu e ley di zonificacion. Door cu e sa cu e lugar desea ta uno cu ta proteha pa ley, e ex mandatario ta bisa cu su afdeling encarga cu e ley di zonificacion ta bezig pa haci cambionan necesario den ley pa por ubica e proyecto di e comerciante aki.
E tipo di maneho aki cu ta cambia ley pa acomoda un hende a yega su fin, na e momentonan aki Minister di Infrastructura lo bay revisa e ley di ROP y lo bin cu cambio, pero e cambionan lo ta total, no pa un persona of un grupito y asina evita e cantidad di casonan den corte cu ex minister Sevinger mes a ocasiona. Minister actual mester bay purba na drecha tur loke a wordo haci robes.
Den e cuadro aki mes, Lopez-Tromp a informa cu e mocion presenta pa Fraccion di POR y aproba door di Parlamento pa investiga tur e casonan cu a bay robes na DIP, sea cu aprobacion of no di dicho departamento lo ta iniciando dentro di poco.