ORANJESTAD – For di Standard & Poor’s a ricibi e noticia cu e credit rating (grado di credibilidad financiero) di gobierno di Aruba a wordo manteni. Esaki ta resultado di un evaluacion teni door di Standard & Poor’s despues di un bishita di trabao efectua na Aruba den final di e luna di April caminda cu a topa cu varios actornan den gobierno y sector priva.
E ratings outlook, cual ta refleha e prospecto cu Standard & Poor’s ta hiba pa un mehoracion di e rating den futuro immediato, a bira negativo. Esaki reflehando e hecho cu crecemento economico lo no ta manera cu anteriormente esaki a wordo premira aña pasa y e peso mas grandi di debe di gobierno compara cu locual tambe a wordo premira aña pasa. E situacion di crecemento economico grandemente e resultado di e situacion rond di e refineria y e situacion di debe resultado di projeccionnan demasiado optimista cu a wordo usa anteriormente. Aña pasa Standard & Poor’s ya caba a baha e outlook for di “positive” pa “stabil”.
Standard & Poor’s pa e motibo aki y al igual cu gobierno di Aruba ta premira un crecemento mas realistico den e aña cu ta bin cual lo ta igual cu e añanan cu a caba di pasa. Den e añanan reciente, Standard & Poor’s ta indica, crecemento economico tabata basta mediocre. Esaki den combinacion cu deficitnan a conduci na nivelnan eleva di debe di gobierno.
Standard & Poor’s ta duna reconocemento pa e decisionnan dificil tuma e aña aki pa purba reduci di manera structural e deficitnan. Como otro puntonan fuerte cu ta accentua e grado di credibilidad ta e grado halto di desaroyo y e relacionnan constitucional cu Hulanda.
Gobierno di Aruba, en particular e ministro encarga cu Finanzas, Economia y Cultura, Sra. Xiomara Ruiz-Maduro, kier gradici tur esnan cu di un forma of otro a coopera na e resultado aki caminda, a pesar di e desafionan financiero grandi cu gobierno y comunidad tin su dilanti, a logra gana e confiansa di esnan cu tin di evalua credibilidad financiero di gobierno.