ORANJESTAD – Departamento di Labor y Investigacion (DAO) ta conduciendo un encuesta/investigacion dirigi na companianan riba mercado laboral cu e meta pa colecta informacion riba diferente temanan pa uza den formulacion di maneho efectivo y eficiente pa loke ta trata e mercado laboral. DAO ta convenci cu bo aporte riba diferente di e temanan aki ta di sumo importancia pa por formula maneho pa e mercado laboral. E cuestionario ta contene diferente tema relevante pero cu un enfasis riba empleo y empleabilidad di hobennan.
Den e economia di Aruba hobennan tin tres biaha mas chens cu adultonan pa ta desemplea. Banda di e estado general di e economia y e situacion laboral, desempleo hubenil hopi biaha ta consecuencia di un mismatch/desahuste entre e habilidadnan cu e hobennan ta posee y e habilidadnan cu mercado laboral ta pidi. Tur e factornan aki ta significa cu e hobennan por haya nan mes den un situacion di desbentaha pa haya trabao den e mercado laboral. Consecuencia di esaki ta pisa fuertemente riba e economia y sociedad en general. E costonan social y economico asocia cu un cifra di desempleo hubenil halto ta rekeri accionnan riba nivel nacional.
Pa e motibo aki, e resultadonan di e hobennan y adultonan hoben di Aruba riba mercado laboral ta un tema importante pa e gobierno di Aruba y Minister di Labor. DAO, cu ta enfoca su mes den promove un mercado laboral equilibra, tin como meta pa logra un conexion optimo entre educacion (vocacional) y e mercado laboral di Aruba como un forma di mehora e resultadonan di e hobennan na Aruba riba mercado laboral. Tambe tin rasonnan economico, operacional y social pa e dunado di trabao haci tur lo posibel pa stimula e creacion di empleo pa e hobennan. E dunado di trabao ta hunga un rol importante den creacion di empleo pa e hobennan.
DAO ta convenci di e importancia di e perspectivanan specifico di e dunado di trabao riba empleo hubenil, y cu por incorpora esaki den e debate riba maneho y accionnan cu lo conduci na programanan nobo pa yuda hobennan integra cu exito den e mercado laboral. Colecta datonan riba e perspectivanan di dunado di trabao riba empleo hubenil cu e meta pa utilisa esakinan den e formulacion di maneho nacional relevante pa creacion di empleo ta, por lo tanto, un forma efectivo pa enfrenta e desafionan den e campo di empleo hubenil.
E investigacion lo ta parcialmente dirigi na investiga den profundidad e transicion di hobennan y adultonan hoben for di scol pa e mercado laboral. E resultadonan di e investigacion lo duna (pa prome biaha) un imagen concreto y detaya di e conexion entre e scolnan na Aruba cu e mercado laboral di Aruba. E imagen aki lo sirbi pa identifica e debilidadnan y fortalezanan tanto den educacion como den e mercado laboral. A base di e resultadonan lo haci recomendacionnan pa futuro maneho.
Den e cuadro aki DAO ta pidi amabelmente tur dunado di trabou pa completa e cuestionario, cu lo manda nan via email, den su totalidad. Pa cualkier pregunta of si ta desea di papia cu un di nos empleadonan, por yama tel. 5237746 of manda un email na [email protected]. Lo uza e datonan solamente pa e investigacion aki. Lo presenta e resultadonan den un forma anonimo y agrega.