Oranjestad: Diadomigo for di oranan trempan di atardi, a cuminsa sinti holornan fuerte di candela na varios parti di nos isla, como custumber y tradicion di tur aña durante celebracion di San Juan.
Hopi persona ta probecha di kima tur sushi cu nan tin den nan cura, pero tin otro cu ta djes cende candela sin pensa riba e consecuencianan, hopi di e candelanan aki ta causa hopi molester di huma cerca bisiñanan den bario.
Hopi biaha tin hende cu ta djes cende mondi na candela y ta bay laga e candela, sin pensa kiko tur por ta e consecuencianan di un candela di mondi.
E candela por menasa casnan den becindario, e ta causa molester di huma pa e habitantenan di e bario, especialmente baby, mucha chikito, hende grandi y hende malo,
Den mondi tin hopi bestia ta biba cu tin hol of neishi , por ehempel, coneu, yuwana, shoco, parha, lagadishi etc. tin di e bestianan aki cu ta protegi pa ley. Ora pega mondi na candela, dimes e candela ta mata varios bestia cu ta den e mondi, paso hopi biaha nan no por huy di biaha y lamentabelmente nan ta muri kima.
Tambe cendemento di candela grandi cu mester pidi asistencia di brandweer, ta costa pueblo di Aruba placa, paso cada bes cu e truck di brandweer e tin su gastonan, di diesel y di personal etc.
Semper prome cu cende un candela mester pensa bon tur e consecuencianan cu e por trece cune.