ORANJESTAD, ARUBA: For di chikito Sr. Gino Winklaar tabata cana den warda di polis San Nicolas. Despues di hopi aña laborando den Cuerpo Policial Aruba Sr. Winklaar a bira hefe di districto di San Nicolas. Pa Sr. Winklaar e ta un honor di por a tuma un responsabilidad nobo pa maneha warda di polis San Nicolas. E prome maneho ta pa crea un bon ambiente den e warda. Despues ta sigui pa re-organisa e warda y na ultimo ta pa drecha e edificio hacie mas optimal pa e trahadornan cu ta haci uzo di e warda 24/7.
“Loke ta haci un trabou saludabel y positivo ta e lugar na unda bo ta traha aden” Sr.Gino a pone den su lista pa haci un cambio den e warda. Sr. Winklaar a topa diferente articulonan cu no ta den uzo mas, edificio no ta den bon mantencion, articulonan bieu y materialnan bieu den e warda. Su prioridad number 1 tabata pa haci un limpiesa completo den e warda pa asina crea un ambiente y imagen nobo pa warda di polis San Nicolas tanto pa e personalnan y comunidad.
Personal di Surveillance dienst San Nicolas, Recherche districto 3, SBV, polis di bario san nicolas y werkman a bini huntu pa asina haci e limpiesa necesario pa un aire nobo pa San Nicolas.
For di 8:00 mainta te cu 4:00 di atardi a haci limpiesa y a tira basta sushi afo. Un baki grandi di serlimar a yena completo pa tira tur cos afo. Den un bon ambiente tur hende a uni pa haci esaki posibel.
Esaki tabata e prome fase tin mas fase cu ta na caminda. Esaki tabata posibel dor di comunica cu e agentenan policial. E plannan aki tabata e mesun pensamento di e agentenan cu ta desea di mira un cambio den e warda.
“Tur hende riba pia a duna 200% di nan banda pa haci e warda limpi y mi ta hopi contento y satisfecho di nan parti” asina Sr.Gino a declara. Esaki ta haci inicio di un comienso nobo pa warda di polis San Nicolas. Cu un hefe di districto nobo e personal nan ta satisfecho di mira cambionan necesario cu ta tumando lugar.