Arte di Palabra 60+ a bira un exito diaranson ultimo den Cas di Cultura, unda cu tabatin un publico grandi y bon anima pa apoya nan representantenan durante e competencia literario aki. Un total di 18 participante, den cual mester duna un aplauso grandi na nos damanan cu curashi, ya cu nan a domina e stage completamente, presentando un storia cortico propio of existente, declama poesia propio of existente y tambe por a disfruta di un tremendo sketch humoristico pero reflectivo, riba uzo di nos dushi Papiamento.
Mester duna un palabra di gran elogio na tur e participantenan, ya cu nan ta miembro activo di un di e gruponan social 60+ di Aruba, unda tin un total di 32 grupo. E gruponan cu a participa tabata: Grupo Flor di Bini Bini, Grupo Uni, Grupo 60+ Playa Pabou, Honey Bee, Grupo 60+ FAVI, Palmita di Oro, Monarcha 55+, Grupo OPPA, Grupo Magadalena, Flor di Brazil, Samen Oud.
Literatura oral tabata algo masha comun y uza den e temponan di antes, unda cu contamento di storia, specialmente esunnan di spirito, tabata deleita e oidonan di tanto mucha, hoben y adulto. Nos grandinan a sa di hiba nos bek den tempo y alabes amplia nos conocemento di vocabulario, cu e palabra-, dicho- y expresionnan di antes. “Sorto di actividad asina nos mester sigui fomenta y sostene den nos comunidad, unda cu nos ta brinda oportunidad na nos grandinan, pa nan bin demostra nan talento literario y tambe aporta na nos bahul di herencia literario. Contamento di storia ta parti di nos tradicion y cultura y mi mester remarca, cu lamentablemente, esaki ta algo cu actualmente a bay hopi perdi”, Ras a enfatisa.
“Mi kier felicita tur e participantenan y tambe duna un palabra di pabien na e ganadonan di e anochi aki cu ta: Sra. Carmen Frans cu ‘Bol’i fuego’ y sra. Shansha Koolman cu ‘E regalo nunca uza’ den e categoria Contamento di Storia. Y sra. Martha de Miranda cu ‘Den scochi di mi wela’ y Emira (Miertje) Rodriguez cu ‘Un logro’ den e categoria di poema”, Ras a sigui bisa.
Un palabra di gradicimento, pero tambe di elogio y motivacion, pa e organisadonan di Arte di Palabra 60+: Grupo Nucleo, Cede Aruba, Departamento di Cultura, Fundacion Lanta Papiamento y Departamento di Asuntonan Social. “Literatura oral semper tabatin un caracter popular, cu a surgi di pueblo y pa pueblo y ta funda riba un base festivo y folclorico. P’esey nos tin cu cultiv’e y documenta nan, pa nos por traspasa e herencia literario pa hopi aña mas”, Ras a termina bisando.