Home » Parlamentario Edgard Vrolijk di MEP: “Ta di lamenta e actitud di sinberguensa di AVP pa purba via corte tambe masacra pueblo”

Parlamentario Edgard Vrolijk di MEP: “Ta di lamenta e actitud di sinberguensa di AVP pa purba via corte tambe masacra pueblo”

by Admin
0 comment 48 views

Desde cu Gabinete Evelyn Wever-Croes a asumi gobernacion den e pais aki no a pasa un dia sin cu tabatin obstaculo pa goberna e pais aki. Nos a drenta un gobierno unda nos a encontra un finansas publico den un situacion pesimo, un economia tranca y problemanan social ta asota e pais aki. Prome contra tiempo tabata un presupuesto 2017 irealistico cu un deficit di 130 miyon florin enbes di un surplus di 25 miyon (155 miyon). Banda di esaki e realidad cu Gabinete Eman 2 a baha na awa sin a entrega un presupuesto 2018, unda cu gobierno di Aruba tabata core e peliger y cada bes bou mensasa di lo haya un KB, cu lo a nifica cu hopi compromiso tambe di esnan di gobierno no lo por a ser cumpli pa falta di madures y responsabilidad. Gobierno por a opta pa laga Gobierno di Reino duna Aruba un KB pero esaki no ta husto pa cada ciudadano, pa e trahadornan di Gobierno y nan beneficionan y nos economia.

Penado no ta pena pa largo
Nos Gobierno hunto cu Staten a tuma e posicion di haci lo maximo na un manera responsabel pa cuminsa mehora nos situacion financiero. E no tabata facil pa por a bin cu un crisisheffing pa por cumpli cu debenan traha na proyectonan PPP y sigur pa yuda den e lucha pa trece mehoracion rapidamente den e parti social na Aruba. Lo mas tristo ta cu te dia di awe e partido AVP cu a haci hopi daño na pueblo ta sigui purba manipula, stroba tur proyecto pa pueblo y tambe trata na sigui dividi y trece odio den pueblo contra gobernantenan cu a tuma nan trabao na serio y un grupo di parlamentarionan cu curashi pa controla nan gobierno. Pero penado no ta pena largo. AVP no tabata pasa un dia ta haci lo maximo y desea pa Aruba haya un KB, cu lo ta coronacion di nan mal maneho, pero diabierna 22 juni CAFT den su propio palabranan a declara cu e presupuesto 2018 di Aruba ta realistico y ta hopi positivo, cu den corto tempo Aruba lo conoce mehoracion financiero. Y cu esaki ta keda un capitulo atras di tension cu ta duna e gobierno e aire pa por cuminsa goberna cu menos presion di Reino Hulandes y CAFT, pasobra nos gobierno si a cumpli. Minister Xiomara Maduro y nos Promer Minister Evelyn Wever -Croes a demostra na Hulanda cu nan por mehora finansas di pais Aruba y cu Hulanda un biaha mas por deposita su confiansa den un gobierno y un parlamento cu ta asumi nan responsabilidad.

No ta paga AVP 1 miyon florin
Pero riba e mesun fecha di 22 di juni 2018 pueblo por wak e intencion berdadero di AVP y nan lider MIKE EMAN pa cu pueblo di Aruba. Cu mala fe di un contract traha door di un director di MFA cu mester por sa mas mihor y cu no por usa e MFA pa reunionnan politico. Pero na final di dia pueblo por wak atrobe cu esaki tabata nada otro cu un set up pa saca 1.000.000 florin di pueblo cu na final pueblo mester paga pe. Danki Dios nos tin un Promer Minister sensato cu ta laga e reunion aki sigui p’asina pueblo no tin di paga AVP inhustamente 1.000.000 florin y cu e placa ey por ser inverti den nos pueblo entre otro den enseñansa. Ta lamenta e mesun actitud di sinberguensa pa purba via corte pa tambe masacra pueblo, ya cu antes e tabata ser haci via parlamento unda cu tabata aproba tur proyecto y hasta surpasa presupuesto di ministernan cu nan por a gasta na mal ordo di dia.
Pa termina pueblo por wak pa nan mes pakico hamas por permiti e grupo di sinberguensanan aki, sin sentimento pa pueblo bin na poder. Awo e lidercito yoron por bay sigui grita numa na MFA Noord, pero e cuenta di banco di AVP ta keda sin haya e 1.000.000 forin cu nan a pensa di haya.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio