Patruya atento di San Nicolas ta logra detene un total di 5 persona, Panter ta rescata uno riba lama y kust surveillance ta detene un persona.
Sero Colorado: Diamars pa mas o menos 8’or y mey di anochi, un patruya di San Nicolas ta wordo manda na altura di e misa den Colony pa dos persona sospechoso.
Gritonan di auxilio saliendo for di lama
Na yegada di e patruya ya e dos personanan a bandona e sitio caba. Un rato despues na altura di Baby Beach nan ta topa cu lifevest muha y nan ta scucha gritamento di auxilio den lama.
Kustwacht ta rescata un persona for di lama
E patruya ta pidi asistencia di Kustwacht, hopi liher e boto Panter ta yega eybanda y ta cuminsa cu un buskeda, nan ta logra rescata un persona for di den lama. E persona aki ta bisanan cu nan tabata 18 persona riba e boto cu a bahanan dilanti costa di Aruba.
Patruya di polis ta detene e prome persona
Riba tera un patruya di polis ta topa cu un persona na altura di e Misa den Colony, e persona aki ta bisa autoridad cu nan lo tabata entre 20 pa 30 persona riba e boto y cu despues cu e boto a bahanan, e capitan a bay bek Venezuela.
Ta haya informe cu 15 pa 16 persona lo a subi tera ilegalmente
Buskeda a sigui, pero no a logra haya mas persona, despues di basta rato polis a papia cu e persona cu nan a detene riba tera na altura di misa y ela cambia su version y a bisa cu ta 18 hendenan tabata riba e boto y cu 15 of 16 persona a logra subi tera y a bandona e area den diferente auto cu a bin buskanan. Dos a keda tras y esaki ta e dosnan cu a wordo deteni, esun cu e patruya a detene y e otro cu Panter a rescata.
No tin suficiente control den Colony
Un biaha mas personanan cu ta drenta nos isla ilegalmente ta burla di autoridad, nan tabata bon na altura cu den e oranan trempan di anochi no tabata tin niun control, cu nan por a drenta den tur trankilidad y supuestamente wordo buska pa diferente auto den Colony.
Patruya di San Nicolas ta logra detene 4 persona mas
Den oranan di mainta ta drenta un informe cu tin 4 persona scondi den un cura di cas den Quillstraat, mesora a manda un patruya di San Nicolas na e adres aki y nan ta logra pone man riba 4 persona mas, cu lo a drenta ilegalmente nos isla, ta trata di dos homber y dos muher. Mesora a detenenan y a pasanan pa Guarda Nos Costa.
Kust Surveillance den oranan di mainta ta detene un persona
Kust Surveillance tambe a logra gara un persona den oranan trempan di mainta, esaki lo a sosode bandi caminda pafo di Colony. No por descarta cu nan lo ta pertenece na e grupo cu lo a drenta ayera nochi na altura di santana di cacho. E persona aki tambe a wordo pasa pa departamento di Guarda Nos Costa.