Recientemente Minister Chris Romero y su colega di Husticia, sr. Andin Bikker, a reuni cu Departamento di Transporte Publico y Cuerpo Policial pa trata e problematica di taxi pirata.
E reunion aki tabatin como meta pa mediante dialogo di ambos Minister y nan departamentonan concerni, crea un maneho mas efectivo y eficiente pa logra combati e problematica aki.
E fenomeno di taxi pirata ta un problematica cu a lanta cabes na Aruba algun aña atras y lamentablemente no a haya un atencion debido na tempo, cual a ocasiona cu awendia tin hopi problema den nos sistema di transporte publico. E frustacion entre esnan cu si ta cana nan caminda legal pa eherce nan trabou di transporte debidamente ta grandi y den tur nan derecho ta exigi pa Gobierno tuma pasonan legal contra e infractornan.
Taxi pirata ta basicamente un vehiculo particular eherciendo ilegalmente un trabou di transporte publico, y como tal e ta un topico cu ta regarda tanto Minister di Transporte y Minister di Husticia. Den e reunion a acorda cu ambos departamento lo haci un sondeo extenso pa asina yega na un maneho mas estricto pa cu taxi pirata. Coperacion y trabou den ekipo ta e factor mas importante pa soluciona e problematica creciente aki, y esey ta haci cu e trabou entre DTP y Cuerpo Policial lo bay ta mas estrecho.
Ministernan Chris Romero y Andin Bikker a compromete nan mes di duna tur e apoyo necesario cu DTP y Cuerpo Policial lo rekeri pa por yega na un solucion pa cu e problematica di taxi pirata. For di awor caba e departamentonan encarga lo cuminsa cu un monitoreo pa asina saca afor ken tur ta trahando como taxista pirata y duna nan e sancionnan prescribi pa ley.