Home » Dakota ta gana Estrella 2-0 den un wega cu no tabata un clasico.

Dakota ta gana Estrella 2-0 den un wega cu no tabata un clasico.

by Admin
0 comment 83 views
E tradicional ‘clasico di Aruba’ entre Estrella y Dakota ta normalmente un wega di calidad halto y hopi excitante. E biaha aki e premio di e wega aki, cu Nacional ya clasifica pa final, ta pa e di dos luga riba tabla di posicion den e Playoff aki.

 

Estrella hungando sin dos hungado clave mane Phaedrick Baromeo y David Dubero, ta cuminsa e wega bastante fragil y sin creatividad den medio campo. E prome parti di e prome tempo tabata tur Dakota, e wega casi nunca a pasa midveld pa Estrella den e tempo aki, e Dakoteronan den control, haciendo pressing na midveld, Estrella en cambio a cuminsa dal duro, kizas den deseperacion of tratando na kibra e wega di Dakota.

 

Dakota toch no a probecha mucho cu e falta di presencia di Estrella den medio-campo. Despues di a purba cu tur cos Dakota, apesar di varios bon chens, despues a mane cuminsa bira slordig den nan ofensiva, atrobe indicando impasenshi. Asina mes apesar di e dominio posesional y teritorial di Dakota ta Estrella a haya dos chens mas cla na 15 minuut pa medio di Alex Hassel y na minuut 30 pa Jean Pierre Van der Linden, cu a haya su so cu portero Eric Abdul cu a salba su porteria na ultimo seconde, dos oportunidad cu por a cambia e cara di wega tempran caba.

 

Den un wega slordig cu hopi tension, referee a haya su mes cu man yen pa controla e wega, carchinan a cuminsa cai tempran caba, un indicacion di kiko ta bai bin mas laat. Despues di hopi ‘toma y dame’ den e ultimo parti di prome tempo, unda no tabatin dominio di un riba otro, e wega tabata mas bien un wega mahos, impreciso y duro fisicamente, halftime a yega asina sin gol.

 

Den e segundo tempo Dakota a cuminsa cu mas organisacion den nan atake, algo cu tabata falta apesar di e debilidad den medio campo di Estrella, a cuminsa miho toke di bala en bes di tira dilanti y core, ademas di e tironan sin destino. Asina mes Dakota no a convence, iniciativa nan tabatin si, y control di bala, pero nada preciso, toch nan chens a yega na minuut 54, despues cu nan a haya un tiro di skina cu a keda rebota dilanti gol, sin por a wordo saka pa e defensa oranjo, e bala a cai den pia di Ezra Bosnie cu no a pordona y a hasi un tiro duro pa anota e gol di bai ariba pa Dakota, mereci si.

 

Estrella no a responde bon, ta parce nan a bai flat despues di e gol di Dakota, creacion tabatin poco pa nan, ta de bes en cuando cu Norvianel Naar y Jean Pierre Van der Linden tabata scapa dilanti pero ora yega di pone e bala den net ta nada un pasa.

 

Dakota ta sigui busca e di dos gol, Ricky Hodge, cu a esforsa su mes hopi den e wega aki, a hera di anota un gol di ‘Chalaka’ na minuut 55, esey lo tabata un joya di gol si el a drenta.

 

Ironicamente ta Dakota tabata mane perde cabes apesar di e bentaha den un wega asina significante. Carchi a cai masha hopi mes den hopi instancia pa ambos ekipo, hopi pa protesta pero tambe pa wega violento. E wega atrobe a bira hopi slordig, Dakota mas cu bala pero sin precision y Estrella a cuminsa contra ataka pero atrobe sin yegada peligroso. Na minuut 66 Dakota a amplia e resultado cu un gol di Robert ‘Killer’ Francis pa hasi e wega 2-0 pa e Dakoteronan.

 

Estrella cu ya tabata atras den marcacion y tambe debilita enormemente den nan wega mes a haya mas mal noticia na minuut 75, ora cu Alex Hassel a haya un stret carchi cora pa wega violento cu a hasi cosnan mas dificil ainda pa e ‘Naranjadanan’. Asina mes cu bentaha numerico Dakota no a sabi di probecha y a sigui cu nan wega eratico por bisa. E yegadanan nunca a cristalisa pa mas gol. Despues Estrella den persona di Norvianel Naar a haya nan di dos carchi cora na minuut 80, tambe pa wega violento, algo cu no ta caracteristica di Estrella. E “amarillo di Dakota” awo tabatin tur chens pa amplia e anotacion y mehora nan “doel-saldo” den comparacion cu Estrella cu awor lo tin e mesun cantidad di punto riba tabla, pero envano, nada a bay bon cu e proposito ey.
Dakota a sabi di ataka, un poco miho den e ultimo 5 minuut di wega contando tempo di descuento, pero un poco laat, e wega a caba 2-0 mes, un wega cu a merece miho, desapunto pa Estrella, pero tambe pa Dakota, apesar di e victoria significante aki, pa e chensnan perdi pa amplia nan bentaha di gol riba Estrella den caso di empate den puntuacion.

 

Ta interesante y tambe precupante pa wak kiko ta bai pasa den e ultimo dia di Playoff 2017-2018 e siman cu ta bin. Den opinion di Futbol Aruba ta importante pa hunga e weganan di e siman cu ta bin, na mesun tempo, un wega na CDGT na Dakota y e otro na CDFF na Noord, pa evita cualkier conflicto di interes, esaki t’e situacion;

 

Nos ‘man of the match’ den e wega aki ta Ezra Bosnie di Dakota pa su empenjo riba cancha y su wega den defensa protegiendo e linea final di Dakota.

 

Dakota y Estrella ta awo empata cu 7 punto riba tabla, Nacional a clasifica caba, Britannia ta elimina caba. E weganan di e siman cu ta bin, riba papel no tin significado pa ambos ekipo, mientras cu e ta si hopi importante pa nan contrincantenan e siman aki, Dakota y Estrella, nan clasificacion pa final ta den wega, ban wak.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio