Home Sports Britannia a keda elimina contra Nacional perdiendo 3-2, apesar di un bon...

Britannia a keda elimina contra Nacional perdiendo 3-2, apesar di un bon wega

Britannia den di cuarto luga cu solamente dos punto riba tabla mester di un victoria pa sigura nan continuacion den e play-off aki. Pa Nacional cu tin ocho punto, un empate mes lo sigura un plazo den e final di division Honor 2017-2018.
E wega den e prome 30 minuut nan tabata uno di dominio di Nacional cu posesion y yegada pero nada di gran peligro. Britannia su strategia tabata uno di defende bon y traha chens den contra golpi, cu en realidad tabata hopi efectivo. Britannia a defende bon wardando Nacional ataka pa despues busca un manera pa tira dilanti cu un bentaha di man to man, asina Britannia a haya hopi chens di habri maracador, apesar di e dominio di Nacional. Esey ta un bon strategia, ta locual nos tin custumber di wak di Nacional mes hasi, pero esey tabata traha pa Britannia.
Asina mes e prome chens di gol cla den e wega tabata di Nacional na minuut 13 pa medio di un tiro liber di Valdo Leocadio unda cu e tiro a dal den palo di gol.
Despues di e chens ey di Nacional ta Britannia a cuminsa tuma mas iniciativa y cu bon yegadanan mane esun na minuut 16 despues di un cruse peligroso di Coco Estrada, Nacional no tabata parce bon prepara pa e contra golpinan aki di pasenan lihe dilanti den dos of tres toke so, asina Lionel Tromp a ricibi un pase di profundidad di Carlos Cano for di midveld, p’asina anota e prome gol di wega pa Britannia bay ariba 1-0.
Nacional a bay bek den posesion di bala y cu basta yegada pero no mucho skerpi, Britannia a opta ba bay den e mesun wega di contra golpi cu tabata asina efectivo te cu awo. Toch e insistencia di Nacional a duna fruta y na minuut 26 ta anota un gol di penalty den pia di Devis Oliveros, un penalty no mucho duidelijk ya cu e bala a rebota for di pia di Junel Sanchez di Britannia lora bay riba su brasa sin intencion algun, pero interpretacion di referee ta conta, asina e wega a bira Nacional 1 Britannia 1.
Nacional a sigui hunga su wega di control, Britannia cu su wega di responde, e Dragon nan cu mas yegada, algun peligroso, e Pumanan cu menos yegada pero hopi peligroso, tur dos portero tabatin man yen y tur dos mester a brilla den nan weganan. Net prome cu halftime na minuut 47, Britannia ta logra haya un tiro liber unda cu Sebastian Montoya ta emula Cristiano Ronaldo cu un beyesa di gol pa pone su ekipo den bentaha, un bentaha mereci te na e punto aki, Britannia 2 Nacional 1.
Den e segundo tempo e wega a mane bira mas balansa, Nacional no necesariamente a sali bay busca e gol di empate, nan a mane relaga Britannia mas espacio, locual a contribui na e wega 50-50 aki, nan strategia mas bien tabata di intercepta y ataka for di eynan, hayando Britannia den un desekilibro, ta nan ‘pan cu manteca’ toch? E strategia ey a kita e peligrosidad di e contra atakenan di Britannia. Un wega balansa den tur aspecto pa mayoria di e di dos tempo, Britannia, claro, a sali pa bay busca e gol pa aumenta bentaha tambe, ya cu un empate di Nacional lo no favorece nan den nada, pesey e busceda di e di tres gol, e gol di seguro.
E wega a sigui di banda pa banda pero sin por a concretisa, Nacional siendo Nacional a warda pa nan oportunidad y e oportunidad ey a yega na minuut 86 ora cu Deffery Banton for di su posicion di rechtsback a hasi un corida y cu un bon pase di Devis Oliveros a fusila e portero Dania di Britannia pa empata e wega 2-2.
Britannia cu mester di un victoria no por a hasi nada mas cu sali bay busca e gol ey, lagando espacio atras, t’asina Nacional a haya nan oportunidad pa bay ariba pa e victoria y den un di nan atakenan a haya un autogol for di cabes di Carl Geerman na minuut 88, Nacional 3 Britannia 2.
Esey tambe tabata e resultado final, un desapunte pa un Britannia cu a hunga hopi bon cu un strategia cu hopi otro ekipo no por efectua contra e actual campeon di Aruba. Pa mayoria di e wega aki Nacional no por a kibra Britannia, pero e pasta di campeon a sobresali toch na e ultimo minuut nan di wega, pabien Nacional. Britannia en cambio ta keda elimina di e manera aki for di Play-Off.
‘Man of the match’ ta Deffery Banton, un hungado di defensa cu ta dificil pa pasa y por hasta sali bay ataka efectivamente, mane a pasa awe.