Parlamentario Endy Croes ta splica cu e politiconan di AVP ta sin gevoel y sin cuero di cara. No obstante cu tur hende ta na altura di e desaster cu AVP a causa unda hasta Staatssecretaris Hulandes Sr. Raymond Knops a reconfirma esaki recientemente den un declaracion televisa cu ultimo 8 añanan e debe nacional di pais Aruba a crece di 40% te rond 90% y a yama esaki cu tur su rason “ZEER DRASTISCH”. Asina el a tipifica e maneho di Mike Eman y Mike de Meza y AVP.
E tristo berdad sunu
Diahuebs ultimo por a scucha Mike De Meza, e autor intelectual di e desaster financiero, den un conferencia di prensa ta splica textualmente: ”Pasobra ora nos a drenta gobierno Aruba tabata den un situacion fragil, un situacion casi den bancarota”. Asina Mike Eman y Mike De Meza a gaña y manipula pueblo di Aruba desde 2009 cu nan a drenta gobernacion papiando di un drama cu nunca tabata existi. Adhunto cifranan di Banco Central cu ta confirma cu nos debe nacional na 2008 tabata 41.7%, pues manera Raymond Knops tambe a bisa y cu den 8 aña bo por mira con AVP a redobla e debe. Cifranan di Banco Central ta yega te 2016 unda por mira cu esaki a alcansa 84% y na 2017 esaki a alcansa 90%. Pues na 2008 (MEP) di cada florin cu drenta caha di gobierno 41.7 cen tabata comprometi na debe y gobierno ta keda cu 58.3 cen pa rond su pais, esta paga salario, inverti den educacion, infrastructura etc etc. Na 2017 despues cu Mike de Meza y Mike Eman a “habraca” e pais aki na un manera nunca bisto nan a logra hinca Aruba den e situacion deplorabel unda di cada florin cu drenta caha di gobierno 90 cen ta comprometi na debe y gobierno ta resta apenas 10 cen di cada florin pa maneha pais Aruba. Esaki ta e tristo berdad sunu. Ainda Mike de Meza tin e curashi diahuebs ultimo pa purba sigui manipula y engaña e pueblo aki unda rapportnan ta papia cla y contrario na locual Mike kier purba splica.
AVP a suta pueblo cu medida
Un otro fragmento textualmente di Mike De Meza den su conferencia di prensa ta lo siguiente: “ Ora nos a drenta gobernacion nos a scoge pa engrandece economia y no pa tuma medida”. Con sincero Mike de Meza ta cu pueblo? AVP a tuma casi 30 medida contra pueblo. AVP a introduci 2% di BAZV, esaki no ta medida? AVP a hisa edad di pensioen manera raton den anochi di 60 pa 65 aña, esaki no ta medida? AVP a aumenta tarifa di inkomstenbelasting y loonbelasting na 2012, esaki no ta medida? AVP a aumenta grondbelasting 1 januari 2012 cu 15% di propiedad, esaki no ta medida? AVP a aumenta prima di AOV cu 2%, esaki no ta medida? AVP a aumenta aanmaning cu tabata 1 florin pa 10 florin, esaki no ta medida? AVP a introduci koersmargin vergoeding, esaki no ta medida? Asina mi tin un lista largo pa Mike de Meza y AVP pa nos kita su mascarada di gañamento y confront’e cu e realidad. Alaves riba su declaracion cu a scoge pa engrandece economia, awe nos ta publica rapport di Banco Central y kier pa pueblo mes mira cu propio wowo. Lesa “Real GDP growth”, pues crecemento economico na 2012 (-1.4%), na 2015 (-0.5%), na 2016 (-0.2%) y na 2017 tambe tabata negativo. Pues no tabata tin crecemento economico y economia ta stagna cu crecemento negativo. Pues nada pero nada cu Mike de Meza a papia ta berdad y adhunto e pruebanan. Parlamentario Croes ta termina bisando cu e ta spera cu un dia politiconan di AVP por bira sincero y stop di hunga cu dolor di pueblo cu avalancha di mentira pa trece desbalance den nos comunidad. Neches lo ta pa bo tuma bo retiro for di politica.