Home » Parlamentario Daphne Lejuez (MEP): ‘Mester mantene enfoke pa servicio di Fast Ferry bira realidad’

Parlamentario Daphne Lejuez (MEP): ‘Mester mantene enfoke pa servicio di Fast Ferry bira realidad’

by Admin
0 comment 52 views

ORANJESTAD – Recientemente parlamentario di fraccion MEP, Daphne Lejuez a forma parti di un reunion hopi interesante na Hulanda relaciona cu e proceso di introduci Fast Ferry pa e islanan ABC.

Durante su ultimo bishita na Hulanda recientemente, sra. Lejuez a sinta cu e consultant cu a skirbi e plan di Fast Ferry pa Aruba, Boneiro y Corsou na 2016. Parlamentario Setty Christiaans-Yarzagaray y sra. Anamaria Pauletta di Corsou tambe a keda invita na e reunion aki. E intencion di e reunion interesante aki tabata pa nan por a haya un miho splicacion di e rekesitonan pa por activa e servicio aki na corto plaso.

Desaroyo economico pa San Nicolas
Segun parlamentario Lejuez, e intencion lo ta pa cuminsa servicio entre Aruba y Corsou, unda cu fuera di e forma practico di transporta persona, auto y container entre e islanan, e lo por tin un impacto economico tremendo pa ambos isla. “Den caso di Aruba, muy en particular pa locual ta regarda e area di San Nicolas, mirando cu e tereno awo ta disponibel pa crea e pier necesario pa e servicio aki na San Nicolas, e lo por sirbi como un catalisador pa actividad economico den e area aki”, segun e parlamentario.

Locual mester traha riba dje awor ta convenionan entre islanan, pero tambe na cada isla respectivamente, pa asina facilita y agilisa e proceso di boarding y disembarking y aki mester simplifica procesonan pa persona y autonan por traslada mas facil entre e dos islanan aki. “Pensa aki por ehempel na inmigracion, douane y SIAD. Nos a compronde cu e ministernan concerni na ambos di e islanan Aruba y Corsou ya ta den contacto over di e proyecto aki”, parlamentario Lejuez ta bisa. Conhuntamente cu sra. Pauletta di Corsou y sra. Christiaans-Yarzagaray hunto cu sra. Daphne Lejuez di Aruba, a keda palabra di percura pa mantene e enfoke riba e servicio di Fast Ferry aki, pa asina e por bira realidad, y hunto cu esaki por trece e impulso economico necesario pa e islanan y duna contenido na nos relacion y colaboracion den Reino.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio