Diaranson Prome Minister Evelyn Wever-Croes a ricibi un menasa basta serio via e canal di radio Canal 90 den e programa Pueblo na Palabra.
Aki un señora a yama y a expresa cosnan hopi mahos cu no solamente ta afecta e orden publico y Gobierno sino pio ainda e señora aki a expresa palabranan di menasa di morto na Prome Minister bisando cu e lo “pasa un bala den su celebro”.
Esaki pa e Premier di Aruba ta e prome biaha cu el a ricibi un menasa di e indole aki y por lo tanto el a entrega keho contra e señora aki.
“Ta e prome biaha cu un menasa asina serio ta wordo lansa desde e periodo di gobernacion aki. Hopi ta puntra si mi a acepta esey sin mas. Wel, mi por bisa cu mi a entrega keho contra e señora y e caso ta den man di Ministerio Publico”.
Prome Minister a expresa cu banda di esey, e minister encarga cu communicacion, Minister Chris Romero a tuma paso legal contra e emisora cu di su banda no a haci suficiente pa tene control riba su programa. Tres biaha durante e yamada e señora a menasa Prome Minister cu morto. Legalmente a impone e sanccion di saca e programa “Pueblo na Palabra” for di aire pa dos dia entrante dialuna awor.
Esaki ta un aviso pa nan y si algo asina ripiti nan por perde nan licencia.
“Gabinete Wever-Croes ta tuma e tipo di menasa y violacion di clausula di e permiso di radio hopi na serio y lo no tolera esaki. Libertad di expresion ta un derecho sagrado cu tur gobierno mester respeta, pero na e derecho aki tin limite na momento cu ta menasa hende cu morto.
Orden y respet mester bin bek den nos pais”, Prome Minister Evelyn Wever-Croes a enfatisa.
