Awe Corte den Prome Instancia di Aruba a trata e casonan contra e sospechosonan Gabriel M. y Risheila F.
E casonan aki ta sali di e investigacion cu e codename ‘Speeltuin’.
E investigacion a cuminza riba 22 di november 2017, despues cu dokternan a constata cu e mucha homber Rishandroh di 5 aña di edad tabata severamente maltrata.
Dos dia despues Rishandroh a bin na fayece a consecuencia di su heridanan.
Den curso di e investigacion a keda constata cu Eugene di 3 aña di edad, ruman homber chikito di Rishandroh, tambe tabata morto.
E curpa di Eugene a wordo haya riba indicacionnan di Gabriel M.
Despues a keda determina cu Eugene a wordo dera riba 27 di september 2017.
Eugene y Rishandroh tabata yiunan di Risheila F.
Como pareha di Risheila F., e muchanan tabata cay tambe bao cuido di Gabriel M.
Gabriel M. ta wordo persigui pa homicidio di Rishandroh y Eugene y pa maltrato serio di e dos mucha hombernan den e periodo prome cu nan fayecimento, mientras cu e muchanan tabata cay bao di su cuido.
E periodo aki a start na augustus 2017.
Banda di e hechonan aki Gabriel M. ta wordo persigui tambe pa e maltrato di Risheila F. pa añanan largo y pa a dera curpa di Eugene pa evita e descubrimento di un crimen.
Risheila F. ta wordo persigui pa medeplegen (comete hunto) of medeplichtigheid (complicidad) di e homicidio di Rishadroh y Eugene y e medeplegen of medeplichtigheid di maltrato severo di e muchanan den e periodo prome cu nan morto, mientras cu e ta mama di e dos muchanan.
Ademas Risheila F. ta wordo acusa di a duna su yiunan insuficiente proteccion.
Ministerio Publico a exigi pa huez condena Gabriel M. pa homicidio di Eugene y Rishandroh.
Ademas a exigi pa huez condenele pa e maltrato severo pa tempo largo di Eugene y Rishandroh, pa e maltrato largo di Risheila F. y pa sconde e curpa di Eugene.
E castigo maximo pa e delitonan aki ta un castigo di prison di 20 aña.
Expertonan a determina cu Gabriel M. ta verminderd toerekeningsvatbaar, por wordo teni menos responsable pa su actonan, tempo cu el a comete e hechonan.
Pa yega na e castigo exigi contra dje, Ministerio Publico a studia casonan comparable y circumstancianan cu lo por haci e castigo mas pisa of menos pisa.
Ministerio Publico a exigi un castigo di prison di 15 aña contra Gabriel M.
Un di e consideracionnan tabata cu Ministerio Publico ta haya necesario cu banda di e castigo di prison mester tambe impone un medida contra su libertad.
Pa e razon aki Ministerio Publico a exigi huez pa impone un castigo di prison y e medida di TBS (terbeschikkingstelling = poni na disposicion di gobierno) cu tratamiento obligatorio (dwangverpleging).
Expertonan riba tereno di comportamiento humano a determina cu Gabriel M. ta sufri di un disturbio di personalidad.
Ademas e expertonan ta kere cu e peligro cu Gabriel M. ripiti delitonan di violencia grave ta sumamente halto, si e no wordo trata.
Mirando cu Gabriel M. a nenga yudanza cu a wordo ofreci na dje den pasado y pa motibo di e peligroso cu e ta, ta indicativo pa tratele den un clinica cera.
E medida di TBS ta posible na Aruba desde introduccion di e Codico Penal nobo na 2014.
Si huez dicidi pa sigui e exigencia di Ministerio Publico, anto lo ta prome biaha cu TBS ta wordo imponi na Aruba.
E meta di e medida di TBS cu dwangverpleging no ta solamente pa trata Gabriel M., pero tambe pa proteha sociedad contra dje.
Personanan cu a haya TBS cu dwangverpleging ta sali den libertad unicamente despues cu expertonan conclui cu e peligro pa nan ripiti nan hechonan a baha pa un nivel acceptable pa seguridad di sociedad.
Den e caso contra Risheila F. Ministerio Publico a exigi pa e wordo declara liber di e homicidionan y di e maltratonan severo.
Ministerio Publico ta haya cu e mester wordo condena pa complicidad na comete e crimennan aki y pasobra el a keda sin ofrece seguridad na e muchanan.
Ministerio Publico a exigi un castigo di prison di 4 aña, di cual 1 aña ta condicional.
Na e parti condicional ta mara tres condicion particular.
Esta, cu e ta keda bao supervision di Reclassering, cu e ta haya tratamiento y cu e ta prohibi pa tin contacto directamente of indirectamente cu Gabriel M. durante e tempo di prueba di 3 aña di tempo.
E castigo di prison cu Ministerio Publico a exigi contra Risheila F. ta bastante mas abao cu esun exigi contra Gabriel M.
E motibo ta cu e mes no a maltrata of a mata e muchanan.
E ta wordo acusa si di a duna Gabriel M. oportunidad pa maltrata e muchanan severamente y mata nan.
Ministerio Publico ta di opinion cu Risheila F. mester a tene e muchanan leu for di Gabriel M. una vez el a haya sa cu e tabata maltrata nan.
Esey sigur cu Rishandroh despues cu Eugene a muri.
A inclui den e exigencia tambe cu Risheila F. mes pa hopi tempo tabata victima di Gabriel M.
Risheila ta ademas un ‘first offender’.
