Home Politics Ministerio di Finansas, Asunto Economico y Cultura: “CONTROL RIBA PRIJS Y CALIDAD...

Ministerio di Finansas, Asunto Economico y Cultura: “CONTROL RIBA PRIJS Y CALIDAD DI PRODUCTONAN NA SUPERMERCADONAN TA SIGUI REGULARMENTE!”.

Ta trahando duro pa garantisa comestiblenan di calidad y na un prijs cu ta na alcance di e comunidad

– E maneho di e Gobierno ta pa e ser humano ta central y desde su entrada como minister encarga cu Finansas, Asuntonan Economico Señora mr. Xiomara Ruiz-Maduro a bin ta promove y stimula Departamento di Asuntonan Economico pa intensiva e control y observación di prijsnan di productonan den supermercadonan riba nos isla. Practicamente tur dia e control ta bin ta tumando luga y dos bez pa luna ta haci un control tambe cu Cuerpo Policial, KPA y Departamento di Salud Publico, DVG. Mester bisa cu e efecto di e control ta positivo y por nota un mehoracion y varios di e supermercadonan a bin ta (mehora) cumpliendo cu e prijs máximo stipula pa gobierno además cu e establecimientonan ta limpi y mas higienico. Esaki ta e resultado despues cu mester a cerá varios supermercado riba nos isla cu no tabata cumpliendo.

Canasta Basico:
E gabinete actual ta conciente cu costo di bida ta halto y pa por garantiza cu pueblo ta haya productonan di e canasta básico na e prijs máximo stipula pa gobierno y cumpliendo cu e deseo di pueblo diariamente ta hibando un maneho di control y observacion di prijsnan di productonan den tur supermercado local riba varios berdura manera promenton berde, siboyo, brócoli, cucumber, lechuga iceberg, carot, tomato roma, kool, cabbage, awacati y pampuna y además frutanan manera e.o. bacoba, banana, milon patia, appel, apelsina y papaya. Otro trabao cu tambe ta wordo haci ta cu durante e trabao di control ta tuma nota di prijsnan pa algún productonan di grano manera por ehempel spaghetti, pasta, y cereal, tambe productonan den bleki y frozen manera juice y lechi. Pueblo por haci uso di e app “Control di Prijs” pa controla prijs di productonan di canasta básico.

Macuto di Compras:
Cu e datonan colecta, e Departamento Económico, DEZHI por haci nan calculacionnan pa locual ta e margen di ganashi riba e productonan pa e comerciante y asina por check si esaki ta aceptabel. Según e ley di prijzenverordening comerciantenan ta obliga pa duna na controladornan di departamento di asunto economico, e facturanan di e productonan cu wordo solicita. Cu e informacionnan ricibi aki e departamento concerni por informa nos pueblo via su publicación den prensa “Macuto di Compras”, den cual ta presenta prijs di algún productonan popular den supermercadonan local. E observación di prijs ta tuma lugar den diferente periodo y districto. Mester bisa si cu den e comparacion di prijsnan no ta tene cuenta cu e calidad di productonan cu por varia entre e supermercadonan. Cu e publicación “Macuto di Compras” pueblo ta wordo informa unda nan por haya productonan manera fruta y berdura na mihor prijs. Ademas esaki ta stimula comerciantenan pa baha nan prijs pa asina ta competitivo cual al final ta fabor di e pueblo.

Recomendación pa ampliacion di Canasta Basico:
Mester bisa acerca cu tur e datonan aki ta traha un relato final cual un comisión di trabao consisti di diferente stakeholder manera mayorista- y detayistanan ta evalua hunto e resultado y hunto presenta recomendacionnan na Minister di Finansas, Asuntonan Economico y Cultura pa asina por amplia e canasta basico cu mas producto.

Banda di esaki a bin studiano otro opcionnan pa asina por importa productonan di otro mercadonan pero si manteniendo e calidad cu e pueblo consumidor ta custumbra cune localmente. Gobierno di Aruba pa medio di Minister Ruiz-Maduro sigui traha duro pa asina garantisa cu tin comestiblesnan na un prijs cu ta na alcance di e comunidad y cu e comerciante ta mantene un nivel aceptabel di ganashi. Pueblo por sinti e cambio, un gobierno cu ta bisa loke e ta haci y ta haci loke e ta bisa.