Recientemente tres parlamentario di Fraccion di MEP, Sue Ann Ras, Shailiny Tromp-Lee y Edgard Vrolijk miembronan di e comision di Educacion, Cultura, Ciencia, Tecnologia y Comunicacion di Parlatino a participa na reunion na Salvador Brasil. Alabes nan por a participa na Bahia Educa y e foro Think Blue/Blue Economics cu a tuma lugar riba Dia Internacional di Oceano.
VARIOS TOPICO
Tabata algun dia largo caminda diferente topico, manera Cultura di Paz, enseñansa y tecnologia, agenda 2030 di e metanan di desaroyo sostenibel y varios discusion y presentacion di UNESCO y Sindicato di Maestro Latino Americano a keda presenta, hunto cu un grandioso exposicion di e hobennan.
DECLARACION FIRMA
Un punto hopi importante ta un declaracion cu a keda aproba y firma pa tur 8 pais presente cu ta trata cultura di paz y kico e paisnan ta palabra di bay haci riba e tereno aki. Den e declaracion ta keda accentua e tarea cu prensa tin riba e tereno aki y con importante educacion ta, pa por realisa e metanan cu lo keda proponi durante e reunion cu lo tuma lugar na september 2018.
THINK BLUE
Manera menciona anteriormente, e parlamentarionan a asisti tambe na e foro di Think Blue/Blue economics cu a trata e topiconan hopi interesante, manera con nos tin cu prepara pa e desaroyonan riba e tereno aki, dunando atencion specifico na pensamento critico, colaboracion, comunicacion, con ta resolve problema, proyecto di liderasgo y conocemento di tecnologia. Otro aspecto hopi interesante ta, nos mester activa e generacion pa loke ta trata innovacion.
Conclusion ta, cu e biahe di trabou sigur tabata uno hopi fructifero, unda e parlamentarionan a haya oportunidad di intercambia idea y trabou y haci netwerk.