Gobierno di Gabinete Wever-Croes a toca e mala suerte cu prijs di crudo ta subiendo mundialmente y cu esaki lo tin un efecto riba nos prijs di gasolin. Subida of bahada di prijs di gasolin na Aruba no tin nada di haber cu asignatura politico sino cu e fluctuacion di prijs mundialmente. Ora prijs di crudo subi mundialmente, prijs di gasolin na Aruba lo subi. Y ora prijs di crudo baha mundialmente, prijs di gasolin na Aruba lo baha tambe.
Gobierno anterior di AVP, a experiencia rebaho grandi di prijs di crudo durante nan gobernacion y sinembargo door di nan mal maneho a kibra regla y ora cu prijs di crudo a baha mundialmente, toch na Aruba nos a conoce subida riba prijs di gasolin.
Ultimo desaroyonan internacional di prijs di crudo ta indica un subida constante. Esaki ta un desaroyo hopi preocupante pa tur pais di mundo. Paisnan den nos region tambe ta preocupa cu esaki pasobra logico ta cu ora prijs di crudo subi, esaki lo tin efecto riba prijs di gasolin tambe debi na e desaroyo mundial aki y con e prijs ta wordo calcula.
E fuente ‘online’ Oilprice.com a publica recientemente un resumen hopi amplio di e desaroyo di loke tin di haber cu prijs di crudo y ta considera esaki como e “cambio di mas grandi hamas bisto” den mercado petrolero cu lo por conduci na subida di prijsnan hopi halto den e proximo lunanan.
Tin varios factor cu ta influencia e prijs di crudo. Locual ta pasando riba mercado mundial ta hunga un rol den subida di prijs. Tambe e escases di petroleo di Venezuela ta haci cu esaki ya no ta mesun acesibel mas. Den un situacion asina ora cu prijs subi riba mercado internacional, esaki tin su consecuencia pa e prijs di benta na Aruba.
Gobierno di Aruba, ta hasiendo tramites pa cambia e forma di calcula prijs di gasolin na Aruba.