E generacion aki y esnan nos dilanti ta mara na e gastonan aki cuminsando na 2019 bay dilanti
Nos Pais tin gastonan cu a wordo haci pa e Gobierno anterior di AVP cu no solamente ta keda core den e gobernacion aki, sino den e gobernacionnan cu lo sigui nos dilanti. Pasobra esakinan ta gastonan grandi cu lo dura pa hopi aña. Minister Xiomara Ruiz-Maduro aki ta referi na e gasto di Proyectonan-PPP. (Private Public Partnership).
E mandatario di Finansa ta enfatisa cu esaki ta e motibo pa cua Gobierno di Aruba mester a introduci un ‘Crisisheffing’ cual, e ta asegura pueblo tambe cu esaki ta temporario mientras nos Pais ta pasa over den un temporada di crisis financiero cu Gobierno actual a hereda for di un Gobierno iresponsabel di AVP.
Banda di esaki tambe, e Minister ta bisa cu otro motibo cu mester a introduci un ‘Crisisheffing’ temporario ta pasobra no solamente Gobierno aki a hereda un crisis financiero sino tambe un crisis social pa cua motibo Gobierno mester a introduci un plan di crisis social cu hopi urgencia ya desde inicio di gobernacion.
Segun un grafiek cu Minister Ruiz-Maduro a presenta, el a indica cu e gastonan di Proyectonan-PPP cu nos pais mester paga ta yega na un suma di 80.7 miyon. E suma aki nos mester cuminsa paga na 2019 bay dilanti. Loke cu e Minister kier enfatisa ta cu no solamente e generacion aki so ta bay paga sino e generacionnan nos dilanti tambe ta bay paga.
Riba e grafiek por nota cu e gastonan di e signatura Oduber ta keda core riba mesun liña. Desde 2014, bou di signatura Eman, por nota e gastonan di Proyentonan-PPP di e Gobierno saliente. E gastonan di Gabinete Oduber ta di casi 9 miyon y e gastonan di Gabinete Eman a alcansa casi 72 miyon. Cua ta un diferencia bastante grandi entre e dos gobernacionnan aki. Hunto e suma cu nos mester paga ta casi 81 miyon.
“Esaki ta e realidad financiero cu nos Pais ta biba aden. Finansas publico no ta e area mas facil di gobernacion. Pero nos ta haci nos maximo esfuerso pa pueblo por comprende kico nos ta pasando y pakico mester introduci ‘Crisisheffing’. Pasobra e gastonan aki ta real. 80.7 miyon ta bay solamente na paga pa Proyectonan-PPP cual ta e careteranan, edificio y klinker. Ainda falta placa pa salibridad, pa educacion y siguridad di nos Pais”, Minister Xiomara Ruiz-Maduro a finalisa bisando.