Minister di Turismo, Salubridad Publico y Deporte Sr. Dangui Oduber a introduci director nobo di Algemene Ziektekosten Verzekering (A.Z.V.). E posicion di director nobo di A.Z.V. ta keda den persona di Sr. Ruben Goedhoop. Sr, Goedhoop tin mas cu 20 aña ta trahando na Price Waterhouse Coopers y tin amplio experencia den maneho. E director nobo a wordo scogi door di hunta di comisario di A.Z.V. hunto cu Minister Dangui Oduber y a pasa den un proceso transparente y habri caminda tur hende cu tabata tin interes a haya e oportunidad igual pa solicita. E hunta di comsiario di A.Z.V. consecuentemente a repasa tur esnan cu a solicita pa e funcion di director y a scoge esnan cu den nan opinion tin a capacidad y ta cumpli cu e exigencianan pa por bira director. Esnan cu a wordo escogi a forma parti di asina yama “short list” cual a termina na 3 persona cual ta ideal pa ocupa e posicion di director. Di esnan escogi a tene entrevista cu nan y a haci escogencia.
Sr. Goedhoop a cumpli cu tur e exigencianan cu ta rekiri pa bira director y ta carga e aprobacion di hunta di comisario di AZV, Minister di Salubridad Publico y di Gobierno di Aruba. Ruben Goedhoop ta un profesional cu tin e capacidad, dinamismo y energia pa trece cambionan den e maneho di A.Z.V.
“Nos a hiba un campaña caminda nos a bisa cu nos kier trece cambio den e maneho di Salubridad Publico den su totalidad. A.Z.V. ta un parti hopi importante den salubridad. Cu e director nobo aki nos ta bai cumpli cu e deseo pa trece cambio den comunidad di Aruba.” Sr. Ruben Goedhoop lo ta remplasando e director saliente Sr. Anko Ringeling. Un danki ta bai tambe na Sr. Ringeling pa tur su añanan di servicio.
Minister Dangui Oduber tin tur confiansa cu Sr. Goedhoop lo sa di trece e cambionan necesario den cuadra di e maneho y vision di Ministerio di Salubridad Publico. Minister Dangui Oduber ta hopi satisfecho cu Sr. Goedhoop a tuma e reto nobo aki y alaves ta desea Ruben Goedhoop tur clase di exito den su funcion nobo.
