Durante su bishita na Colombia, Minister Chris Romero a logra reuni cu diferente institucion di interes pa Aruba. Di e manera aki e titular di Transporte, Comunicacion y Sector Primario, ta buscando mas opcion pa Aruba ta mas avansa den diferente ambito.
Durante un reunion hopi interesante cu e Vice Minister di Agricultura di Colombia, sr. Carlos Manuel Zambrano, a trata topiconan manera e importacion di productonan comestibel for di Colombia cu lo ta na prijs mas economico di locual tin awor na Aruba. Cu e convenio di e asina yama “Open Sky Policy”, lo bay ta mas facil pa importa un gran variedad di producto comestibel, no solamente via avion pero tambe via maritimo.
Un otro punto hopi importante cu a trata cu e Vice Minister Colombiano di Agricultura tabata e topico di importacion di carni for di Colombia. Ta conoci cu na Corsou a cuminsa importa carni for di Colombia y na un prijs hopi mas abou cu loke nos ta pagando actualmente aki na Aruba. Carni Colombiano ta conoci pa tin un calidad halto y na un costo mas accesibel, cual combina cu e sercania y e posibilidadnan actual entre Aruba y Colombia, lo bira un aspecto di hopi beneficio pa nos isla.
Colombia ta mustra un gran interes pa exporta nan productonan pa Aruba, di e mesun manera cu nos ta interesa pa importa productonan for di e pais aki. E siguiente paso pa sigui ta cu e Gobierno Colombiano y di Aruba lo haci e procesonan necesario cu e diferente instacianan concerni pa asina purba yega na un coperacion di tur partido, lo mas pronto posibel pa cuminsa importa carni for di Colombia pa Aruba.
Convenionan sumamente positivo pa nos pais y cu sigur lo bira realidad den un futuro no mucho leu. Tur esaki ta traduci den adelantonan sumamente positivo na beneficio di Aruba.
