Na su yega bek na Aruba, despues di un bishita di trabou na Hulanda, Prome Minister Evelyn Wever-Croes a expresa cu apesar cu su prome biahe na Hulanda como Prome Minister di nos pais tawata un biahe di hopi cansancio, toch e ta un biahe cu a lage sumamente satisfecho. E mandatario principal a bisa cu prome cu el a realisa e biahe aki, e tawatin e sentimento cu esaki lo no bay ta fasil pa traha riba e desconfiansa y conberti esaki den confiansa. Pero den su dies dianan di bishita, e ta sinti cu poco poco e confiansa ta bin bek.
Prome Minister a reuni cu Rey Willem Alexander. Un persona segun e prome mandatario, cu ta sumamente intersa den Aruba kende ta na haltura di loke cu ta sosede na Aruba. E Rey a desea Aruba, pa medio di Prome Minister, tur cos bon.
Prome Minister a expresa e palabranan di Premier Mark Rutte kende a bisa cu e ta mira e cambionan positivo pa Aruba y cu poco poco Hulanda ta haya confiansa bek den Aruba.
Riba su reunion cu Secretario di Estado Raymond Knops, Prome Minister ta bisa cu e tawata tin bon conbersacionnan cu ne y ta negociando ainda riba normanan nobo pa nos presupuesto y nos plan financiero. Ainda no a haya un acuerdo completo riba e plan financiero cu Premier Wever-Croes a presenta. Den e siguiente dianan nos dilanti, Gobierno di Aruba lo mester haci algun ehercisionan riba e tema di gastonan di personal di Gobierno.
A logra un acuerdo si den e reunionnan cu señor Knops cu Aruba lo haya dos aña di tempo pa trece e presupuesto den balanse y yega na un surplus. A yega tambe na un acuerdo cu den dies aña Aruba mester baha e debe di 90 porciento pa 70 porciento y den e siguiente dies aña mas o menos esaki mester wordo baha te 50 porciento mas o menos.
Un otro tema cu a wordo trata cu señor Knops ta e tema di supervision. Aki a yega na palabracionnan concreto tambe.
“Awo falta algun detaye pa nos traha ariba e siguiente dianan nos dilanti pa asina nos por yega na un acuerdo completo. E ora nos por bisa cu nos tin trankilidad pa goberna. Nos tin un plan financiero nobo cu ta wordo sosteni door di Hulanda pa di e manera aki no bin niun menasa mas di ningun ‘aanwijzing’ of KB”.
E tema di Venezuela tambe a haya hopi atencion te hasta cu tawatin un debate riba esaki den Parlamento Hulandes. Cu Minister di Relacionnan di Exterior Señor Stef Blok tambe a yega na palabracionnan con pa atende cu e proceduranan y e trabounan cu tin di wordo haci mientras cu Aruba ta caba di traha su plan completo con pa atende si tin mester bin un problema di refugiado y Venezolanonan drente masalmente nos pais pa mira con e financiamento lo bay tuma luga. Prome Minister a menciona den varios ocacion cu Gobierno di Aruba a entrega un peticion na Nacionnan Uni, Union Europeo, Hulanda y Merca pa cu e problematica aki. E mandatario tin confiansa cu esaki tambe lo bay tin un resultado positivo.
Prome Minister a termina bisando: “Mi por mira atras cu hopi satisfacion riba un biahe hopi positivo cu hopi reunionnan y conbersacionnan pa convence Hulanda cu awo si Aruba tin un Gobierno nobo y responsabel cu un cambio grandi den mentalidad. Tin un deseo grandi di pueblo pa nos por soluciona nos problemanan y esaki ta un bon base pa tin un confiansa nobo entre Hulanda y Aruba. Mi a bin bek cu un satisfaccion enorme pa mira cu e prome pasonan pa e confiansa ey nos a logra”, ta e palabranan di Prome Minister Evelyn Wever-Croes na su yegada na Aruba.
