Gobierno mester espacio y tempo pa su plan caminda e hende ta central den dje
ORANJESTAD – Otro preocupacion cu Cft a trece dilanti den nan conseho ta e gastonan di personal y aki e mandatario encarga cu finansa publico durante conferencia di prensa a splica cu gobierno awor bao liderazgo di Minister President tin un comision cu ta trahando riba un propuesta pa yega na un solucion. Ya Conseho di Minister a haya un draft pa repasa. Nos mester ta sincero, nos no por djies yega bisa cu bo ta manda un cantidad di hende cas y esaki lo no tin consecuencia cune, pasobra sigur e lo tin un consecuencia social. Manera treci dilanti pa minister Ruiz-Maduro no ta pornada cu den Presupuesto di pais Aruba tin 10 miyon extra na gasto di personal, siendo cu mester baha personal. E mandatario ta acentua cu den e prespuesto 2018 di pais Aruba aproba tambe tin un social crisisplan cu ta exigi di dje cu bo mester di hende pa haci e trabaonan aki. Ademas di otro banda como gobierno bo no por yega bisa cu bo ta manda 100, 200, 500 hende cas, pasobra locual cu sali di porta dilanti lo bini drenta di porta patras. Es decir esnan cu no tin trabao y cu sector priva no por tuma nan, nan lo bin gobierno pa haya bijstand. Bo no por kere cu den 6 luna bo ta drecha loke 8 aña a bay scheef. E gobierno aki mester espacio y mester tempo. Espacio pa bini cu un plan coherente, un plan caminda e hende tambe ta central den dje, paso corda bon ta hende bo ta manda cas for di un gobierno, kiermen bo mester percura cu cos ta bay manera mester ta, sino bo ta crea un otro problema pabo. Kita hende manda cas no necesariamente ta baha bo gasto, bo por hayabo cu extra gasto tambe. Pesey mester tin espacio pa asina tin un plan bon hinca den otro. Gobierno a brinda Cft tur informacion y nos a compronde cu Cft despues lo bay duna su replica ariba locual gobierno a trece dilanti. Gobierno a atende cada un di e preocupacionnan di Cft, pasobra largo tempo nos pais tabatin gobernante cu ora algo asina bini, nan tabata hinca nan cabez den tera, pasobra eleccion ta mas importante. Nos tin cu atende cu e asunto aki si nos kier pa e pais aki progresa y sigur si nos kier drecha nos finanzas publico, no ta tur decision ta popular pero locual cu bini cune ta necesario.