Recientemente por a nota varios post y comentario tocante e mayornan orguyoso di nan yiu, cu a logra pasa e famoso y desastroso test di havo/vwo, cu ta e unico instrumento di midimento cu ta uza, pa defini si un alumno di klas 6 ta bon pa drenta Colegio of no. E sentimentonan ta varia, ya cu pa esunnan cu si logra, ta un ‘pluimpje’ y e otronan cu no logra ta un decepcion total. “Como mayor, mi mes a biba e decepcion devastador y cuestionabel aki y mester a atende cu mi dos yiu muhernan, na momento cu nan no a logra pasa e test di havo/vwo, cuestionando nan potencial y inteligencia como alumno ehemplar desde klas 1 te cu klas 6 (semper den e top 3 mihonan di klas) y causando un decepcion y frustracion den pleno desaroyo di e fase di transformacion mas crucial di mucha pa hoben”, Parlamentario Sue-Ann Ras di fraccion di MEP a expresa.
HISTORIA TEST DI COLEGIO
Den historia di enseñansa ningun Parlamentario a haci un cambio significativo. “Test di Colegio tin su linea di historia y tur aña mi por combibi cu e mayornan, tanto esunnan feliz, como esunnan defrauda. Con por ta posibel, cu nan no por a wak e linea cora aki, cu ta solamente perhudica nos muchanan!”, Ras indica. Djis pa refresca memoria un poco di e ultimo desaroyonan cuestionabel di enseñansa basico pa enseñansa secundario. Test di havo/vwo tabata basa antes riba un test psicologico, cual tabata e unico instrumento tambe pa test un mucha di klas 6, si e ta apto pa drenta of no.
Antes SMOA tabatin poder absoluto. Cu intermediacion di ex minister Dowers y Hooyboer Winklaar a base di conseho di SMOA, Departamento di Enseñansa, DPS y Inspector di Enseñansa a dicidi pa cambia e test psicologico y haci un test di Hulandes y matematica na su luga. E momento ey, a exclui e otro directivanan, esta; SKOA y SPCOA, cu tambe ta forma parti di e cuerpo di enseñansa secundario y basico, mientras cu segun ley ABB 1999 no 62. y ID AB 2015 no 28 articulo 5 inciso 1 y 2 ta menciona, cu nan tambe ta forma parti di esaki. Cuestionabel tabata, con por a permiti cu solamente SMOA y DPS hunto cu ex minister Dowers tabata defini y stipula kico ta e normativo di e test. Pues a opta pa cuminsa midi potencial y inteligencia di nos muchanan di klas 6 y defini nan carera secundario, a base di unicamente dominio di Hulandes y matematica.
CAMBIO RADICAL
E normativanan ta stipula pa e mucha haya conseho di HAVO, segun e admision describi pa minister. E aña aki a bolbe conoce un cambio radical y a aplica e siguiente criterianan den e scolnan basico:
- E alumno cu tin un promedio di 7.5 pa e materia Hulandes y matematica, tanto den klas 5 como klas 6.
- E alumno mag riba di tin 14 aña of mas riba 1 di october di e prome aña di CB1 (kiermen e por a keda sinta 1x y no mag di ta den klas 6).
- E otro cifranan di rapport, netamente e ‘zaakvakken’ no tin influencia riba e conseho.
‘ZAAKVAKKEN’
Remarcabel ta, e discrepancia y falta di delineacion di e balor di e materianan conoci como ‘zaakvakken’, esta: geografia, historia y conocemento di naturalesa. Durante henter e trayecto di scol basico, e materianan aki ta conta pa un alumno bay over. A pesar cu e contenido di e materianan no ta esun miho, cual tambe mester haci un revision, nan tin cierto peso y ta midi ‘cierto’ nivel di inteligencia di e alumnonan. “Pa mi, e ta keda ‘cierto’ nivel, paso den hopi caso, ta trata di djis siña for di cabes y reproduci informacion”, segun Ras. Pa haci test y drenta Colegio nan no ta conta, pero pa drenta MAVO di SKOA si e materianan aki tin su peso, ya cu si un mucha no logra pasa e test di Colegio y su ‘zaakvakken’ ta onvoldoende, e NO por drenta MAVO, paso eynan si, nan ta conta. Pues e alumno aki ta para te na EPB. Unda e logica y delineacion pa no perhudica un mucha a keda?