Parlamentario Endy Croes a splica cu el a tuma nota di un articulo bastante chistoso di Parlamentario Michael Lampe. Mester a pensa pa un rato largo si ta bale la pena duna Michael Lampe atencion pa contest’e y corigie evaluando alaves cu pueblo ya no ta keriendo mas den AVP. Den Michael Lampe su articulo di diasabra ultimo e ta splica textualmente cu “no tabata tin respet pa nos pueblo cu awor despues di 8 aña ta bolbe wordo confronta cu BBO y BAZV.” Ora bo lesa algo asina bo ta puntra bo mes na promer lugar kico exactamente Michael Lampe kier a purba di trece dilanti aki? Tambe bo ta puntra si berdaderamente e politico di “panlefi” aki kier pretende cu den 8 aña AVP no a mishi cu BBO of BAZV? P’esey mi ta asumi cu ta un “PATATU” lo ta dal Michael Lampe momento cu e ta skirbiendo e disparate aki. PATATU ta un atake cu un persona por haya y ta desmaya cual ta bin tambe di un estado di nervionan abnormal.
Lampe tabata biba na Aruba?
Pa ta exacto dia 1 di December 2014 AVP a introduci pa promer biaha den historia 1% di BAZV cual nan a djis hisa benta durante un reunion publico sin ningun conseho. Como 6 luna despues, esta 8 di Juli 2015 AVP a aumenta BAZV cu 1% mas durante un otro reunion publico. Pues Michael Lampe por tabata biba na Aruba? Un otro pasada den a articulo cu nan a skirbi pa Lampe: “Loke a tuma lugar den Parlamento ningun momento tabata tin algo di haber cu bon gobernacion”. Mi pregunta na Michael Lampe ta lo siguiente: Bo ta compronde si kico ta Parlamento y kico ta Gobernacion? Bo sa cu tin un diferencia entre nan dos? Bo sa cu bo trabao ta pa controla gobierno, haci pregunta y debati? Notabel ta cu dia 24 di April a trata presupuesto di pais Aruba y 22 di Mei a trata e Ley di Crisis Heffing y ambos reunion tabata tin un duracion di 15 ora cada dia pa un total di 30 ora hunto. Den e dos reunionnan aki Michael Lampe no a hiba ni un solo palabra. Pues sinta henter dia pa na final vota contra sin bisa algo kico ta su contribucion den esaki. Bo no tin berguensa di cobra fin di luna?
Orguyoso di e debenan
Finalmente Michael Lampe na yoramento cu e nomber di B-AVP 1.5% cual ta e heffing pa paga proyectonan PPP di AVP cu ta costa e pueblo aki 80.5 MIYON florin y pa 20 aña largo. Esaki ta pa su hendenan keda corda cu ta gobierno di AVP ta culpabel di esaki. Mi pregunta na Michael Lampe: Ken a causa e desaster financiero aki? Raymond Knops fin di siman a splica esaki bon cla, esta cu den e ultimo 8 añanan e debe di Pais Aruba a mas cu redobla di 40% pa rond 90%, segun Knops. El a yama esaki “ZEER DRAMATISCH” den su entrevista. Mi lo whatsapp e video di Raymond Knops pa Michael mes por wak’e y scuch’e cu atencion. Ken Michael Lampe ta pensa anto cu Pueblo lo mester keda corda riba e desaster di ultimo 8 añanan? Mas cu claro e contesta corecto ta bo lider Mike Eman y AVP kende alaves a grita cu e ta orguyoso di e debe y e debe t’ey pa nos tur pag’e. Ta obvio cu Michael Lampe ta sufri di un sistema nervioso cual ta produci PATATU momento e ta skirbiendo su bobedadnan.