Home Sports Estrella y Nacional ta bataya otro pa prome luga di Play-Off den...

Estrella y Nacional ta bataya otro pa prome luga di Play-Off den un wega yena cu incidente

Estrella vs Nacional ta e bataya pa prome luga entre e top dos ekiponan riba tabla di Play-Off. Estrella te cu e wega aki tin seis punto, producto di dos victoria convincente contra Britannia y Dakota, nan ‘doel saldo’ ta +4 den dos wega, alaves un tipo di futbol bistoso. Nacional no ta campeon di anja pasa por nada, nan por hungabo y destruibo si bo cai den nan wega. Nan wega ta di dominacion fisico y mental, nan por hungabo ‘man-decking’, nan midveld ancra pa Valdo Leocadio ta casi impenetrabel riba un bon dia. Nan tin 4 punto den di dos luga riba e tabla, cu solamente un gol anota den dos wega te cu awo, algo raro di e ekipo cu a anota mas gol den e campeonto regular, nan doel saldo den Play-Off ta +1, pero, cu talentonan mane Devis Oliveros y Kenroy Ranger ta un ora pa otro nan por explota.

 

E prome tempo tabata un wega di tension, di hopi bruhamento, e no tabata un wega di movimiento liber locual a hasi’e menos atractivo ya cu no tabatin espacio pa crea y move. Estrella a purba ataka riba e alanan ya cu e medio campo tabata bon congestiona pa Nacional, pero e yegadanan no tabata skerpi, nan a purba cu tironan di distancia tambe pero envano.

 

E wega aki a favorece Nacional, nan tabatin mas yegada y mas chens den e prome tempo aki. Estrella no por a hunga nan wega, nan a cai den e trampa tactico di e Dragon nan. Nacional a press y controla medio campo mane ta nan custumber, tira dilanti pa Devis Oliveros y Kenroy Ranger, apesar cu den e wega aki e no a bay mucho facil, nan tambe tabata un poco frustra, pero si miho cu Estrella. Na minuut 6 caba un intercepcion di Edward Clarissa a duna Ranger un bon chens pa habri marcador pero un tremendo salbada di portero Navarro di Estrella a salba su ekipo. Apesar cu ya e wega tabata duro caba ta un carchi geel so a cai, pa Nacional, den persona di Chido Van der Biezen, pero pa reclama. Na minuut 10 Nacional ta bolbe haya un chens cla pero Ranger ta bolbe faya ora cu portero Navarro despues di un bon salida ta causa cu e bala ta bay na banda.

 

Nacional ta sigui press y domina medio campo, preveniendo Estrella traha wega, no tabatin contesta pa e wega ey di Nacional. Mientras cu e wega duro ta sigui, Pancho Croes den un encontronaso den aire ta cai di mal manera y ta fractura su dede di man, pero ta sigui hunga asina mes despues di tratamento banda di veld. Te cu e minuut 20 ainda ta Nacional tabata cu mas proposito y atake den e wega. E prome carchi geel pa wega duro alfin a wordo duna na minuut 22 na David Dubero, e defensor di e ekipo di Papilon. Un bon reaccion di e referee te na e momento ey, pero e no a sigui duna waarschuwing of hasta duna mas carchi apesar cu e wega tabata birando mas duro cu mas tension cada momento, ta kiko lo a pasa? Na minuut 24 Estrella a cuminsa hunga miho, cu mas yegada, hasta un tiro liber cu a dal den palo na minuut 25, tira pa Joel Geerman.
Un wega hopi compacto na e punto aki, di hopi contratempo y agresividad. Cu un medio-campo asina popula ta claro cu ta bay tin mas ‘botsing’, hasta e estelar defensor di Estrella, David Dubero, eventualmente mester a bandona cancha lesiona. Apesar cu e wega ta sigui cu hopi ‘overtreding’, hungadonan ta sali for di cancha riba strecher, niun carchi a wordo duna atrobe pa wega peligroso of agresivo te cu na parti final di segundo tempo, pa ta exacto minuut 71 (tabatin un carchi geel tambe na minuut 69, duna na Deffery Banton di Nacional pero pa hunga e bala cu man). Hungadonan ta capitalisa riba e cosnan ey, ta mane un candela chikito cu si e no wordo combati na e punto ey, ta grandi so e por bira despues, te na e punto cu e no por wordo controla mas, vooral den un wega asina grandi, yena cu emocion y tension. Halftime ta bay aden 0-0, un wega di tension y hopi accion pero tambe di hopi incidente.

 

Den e segundo tempo Estrella a cuminsa cu mas penetracion y proposito, nan a mane tuma e iniciativa for di Nacional pero e chensnan di gol no ta mucho skerpi. Nacional ta responde bon y ta sigui hunga nan wega, e partido awo di banda pa banda pero sin chens grandi dilanti gol. Estrella su iniciativa t’asina ambicioso cu hasta Pancho Croes ta sali bay ataka, un riesgo cu Nacional por a exploita. Estrella cu chens basta bon den pia di Hugo Robert na minuut 61 pero ta faya di wak Phaedrick Baromeo full habri na su banda, chens perdi, y no tin hopi! Na minuut 63 Baromeo ta penetra atrobe pero ta wordo stabilisa na un manera duro y e ta mane retalia cu un skop riba e defensa, pero ta faya. Na minuut 64 Marck Laurence di Estrella ta skop Kenroy Ranger na un manera cu tabata merece carchi, di biaha despues Ranger mes ta retalia riba Joel Geerman den un entrada duro, di carchi ni waarschuwing nada tampoco. Na minuut 70 Alex Hassel den un encontronaso cu Valdo Leocadio na linea di veld cu intercambio di palabra. Na minuut 71 Oliveros ta haya carchi geel pa un entrada (“Brace”) riba Pancho, cu a resulta den un encontronaso entre nan dos despues cu Pancho a bay reclama Oliveros na un manera duro, Pancho tambe mester a haya un carchi p’esey.

 

Den un ‘toma y dame’ cu a sigui, e wega a bira miho cu mas yegadanan, pero e ‘toma y dame’ cu violencia no a para toch. Alfin na minuut 86 Nacional a anota e prome gol di wega ora cu e hoben Joshua Aguirre a hasi un tremendo pase pa Kenroy Ranger den area penal, unda cu Ranger a bai purba baha e bala cu pecho pero e bala a scapa bay pika na banda di e portero Navarro cu tabata saliendo stret riba Ranger, e bala a gewoon pika y lora na banda pa drenta gol, suerte pa Nacional, mala suerte pa Estrella, pero gol e ta, pa duna Nacional e bentaha di 1-0. Pero e wega aki y e incidentenan ta lew for di caba ya cu t’awo e “vuurwerk” ta di bai cuminsa. Despues di e gol, e wega a bira mas violento ainda. Carchi a sali na minuut 89 pa Andre Kelly di Nacional pa wega bruto, entre manotasonan y skopmento cu ta zwaai, na minuut 90+3 Ranger ta bolbe haya un chens enorme pa likida e partido pa Nacional, pero ta faya atrobe, pa despues na minuut 90+8 bolbe dal e bala den tubo! Pero loke ta sigui despues cu e bala a rebound for di e tubo ta e storia di e wega aki. Ora cu e bala a sigui lora dilanti gol, pa despues Pancho rechaza pero e bala ta keda den area penal, unda cu Andre Kelly a drenta Joel Geerman di Estrella na un manera duro, pa despues Geerman tira un elboog riba Kelly, cu na su turno ta tira un mokete y vloer Geerman, eynan Melrick Dabian di Estrella ta tira un karate kick riba Kelly, pa colmo Marck Laurence ta bin tira un golpi riba Kelly tambe, carchi cora pa Kelly y Laurence.

 

Mientras cu un bululu di pushamento y gritamento ta sigui den area penal, referee alfin ta dicidi di pita p’e wega di MMA aki caba tambe. Tristo cu e wega tabatin un final asina, y practicamente full e wega, awo mester revisa e wega aki, con ela wordo pita. Niun hende ta perfecto, pero e wega a bay for di man, esey no tin duda, awor mester busca un solucion pa preveni e cosnan aki cu ta afectando nos futbol, no solamente riba tereno pero tambe den e gradonan di e fanaticonan, cu entretanto en bes di bai wak un evento ‘deportivo’  a hayanan ta wak anti-deportivismo y tendencianan anti-social cu insulto, menasa y agresion no solamente entre hungadonan, referee, pero tambe entre e fanticonan mes, incluyendo e hoben nan cu ta wak na stadion mes, riba television y den media social.

 

Nacional ta lidera e Play-Off awo cu 7 punto, sigui pa Estrella cu 6 punto, lagando Britannia cu 1 punto y Dakota cu 0 punto so, sperando riba nan wega pendiente. Si  cossigui asina, ta pinta cu Nacional y Estrella ta favoritonan pa topa den final, pero, falta ainda e di dos rond di e fase aki, ainda hopi cos por pasa.