Home » Parlamentario Daphne Lejuez: Varios idea y informacion valioso comparti durante reunionnan den cuadro cu IPKO

Parlamentario Daphne Lejuez: Varios idea y informacion valioso comparti durante reunionnan den cuadro cu IPKO

by Admin
0 comment 81 views

ORANJESTAD – Segun parlamentario Daphne Lejuez di fraccion MEP ta informa, diahuebs cu a pasa tawata un dia sumamente interesante y educativo pa miembronan di varios delegacion di IPKO (Interparlamentair Koninkrijks Overleg). Esaki relaciona entre otro cu desaroyonan sostenibel pa desperdicio y presentacionnan di diferente estudio di agricultura y ecologia.

“Nos a bishita AVR (Afvalverwerking B.V.), un planta cu ta recicla desperdicio y produci energia por medio di kima sushi na un forma eficiente, sostenibel y ecologicamente responsabel. Asina aki ta reduci/elimina e necesidad pa tin landfill y ta reduci tambe emision di CO2 ”, sra. Lejuez ta splica. E miembronan di varios delegacion di IPKO a haya un recorido pa wak e planta y haya un splicacion di nan modelo di negoshi. “Cu claro ta economicamente rendabel, pero alabes ta resolve e problematica social di desperdicio”, parlamentario Lejuez ta expresa.

Un opcion pa Aruba
E parlamentario ta sigui bisa cu el a puntra tocante e escala di esaki riba Aruba cual a wordo contesta por medio di AVR cu e lo ta posibel pa opera na Aruba, pero obviamente bo lo mester down-size e tipo di instalacion cu bo ta bay uza.
Pues den e caso aki lo por instala solamente un forno so cual lo hiba na costonan di alrededor di 40 euro (80 florin) per ton di sushi. Pero esaki ta solamente e parti di procesa e desperdicio via incinerator, ya cu adicional na esaki tin e pikimento y otro gastonan di operacion cu lo mester wordo inclui, pues no ta solamente e 40 euro so di gasto. Na Aruba nos ta produci mas o menos un total di 120 ton di desperdicio pa dia. Pues mester wak tambe kico e lo nifica na costo pa mas o menos 45 mil casnan y negoshinan. “Pero lo mester haci un calculacion, pa wak si e ta un opcion viable, y tambe si tin companianan local cu kisas tambe por ofrece e servicio aki of lo por traha hunto cu un compania manera AVR”, parlamentario Lejuez ta comenta. Na AVR por ehempel e sushi ta wordo kima te na punto cu locual ta keda ta as. Nan ta bay mas leu ainda caminda tin hasta un parti unda nan ta recupera tur plastico – di tur tipo grandi y chikito manera dopi di pen di ballpoint – nan ta saca bek for di e stapel di e sushi pa recicla esaki bek. E meta di AVR ta pa stimula un “circular economy”, unda reciclahe ta central. Mientras cu AVR ta enfoca mas tanto riba proyectonan grandi na Europa, nan a informa cu nan lo ta dispuesto si pa wak si por conseha nos dependiendo na nos necesidad na Aruba. Lejuez: “Mientras kisas e proyecto di desperdicio cu minister di Infrastructura ta avansando, semper ta bo pa siña lo mas posibel riba e topico aki y tur posibilidad y avancenan innovativo y tecnologico den e ramo aki”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio