Savaneta: Diahuebs algo prome cu 7’or di mainta ta sosode un accident basta serio riba e caminda principal di San Nicolas pa Oranjestad, e accident a sosode na e crusada pabou di House of Cake na Savaneta. Mesora a manda polis, ambulance y materialwagen di brandweer na e sitio.
Na yegada nan ta bin compronde cu un Chevrolet Spark Shinishi, maneha pa un homber tabata bayendo pabou, aparentemente e tabata pasando varios auto y a bin topa cu un bus di Arubus biniendo di direccion contrario, dus bayendo direccion di San Nicolas. E chauffeur di e Bus y ni e chauffeur di e Chevrolet Spark no por a haci nada mas y e Chevrolet Spark a dal frontal contra e bus. E bus tabata transportando mucha di scol, den e impacto un di e muchanan a wordo herida na su schouder, nada di gravedad y personal di ambulance a trat’e na e sitio mes.
E chauffeur di e Spark tabata herida y tabata pega den e auto, materialwagen di brandweer a yega hopi liher na e sitio y mesora e personal di brandweer a cuminsa cu e trabounan necesario pa libera e victima for di den e auto, mientras tanto e personal di ambulance tabata tratando e victima na e sitio.
Despues cu e victima a wordo saca for di e auto, ambulance a transporte cu urgencia pa hospital.