ORANJESTAD – Den su bishita na Hulanda, Prome Minister Evelyn Wever-Croes no solamente a atende cu reunionnan bastante intensivo sino tambe el a tuma e oportunidad pa reconoce hobennan cu a resalta na Hulanda y cu a pone nomber di Aruba briya internacionalmente.
E rumannan Jaillen Laclé y William Laclé, miho conoci como ‘The Laclé Brothers’ a core cu bicicleta for di Hulanda te na Singapore. Dos hoben Arubiano cu un pasion grandi pa deporte kendenan a hiba e bandera Arubiano den varios pais den oeste.
Prome Minister a combersa cu nan y a scucha nan experiencianan durante e viahe cu tawata hopi impresionante.
Mishally Wever ta e prome ciclista femenino cu na mita di e ruta a uni cu e rumannan Lacle. El a core for di Thailand te Singapore riba bicicleta. Mishally ta un hoben cu hopi determinacion cu ta un inspiracion pa hopi mucha muher. El a comparti su experiencianan durante e biahe cu ta hopi interesante.
Prome Minister Evelyn Wever-Croes, den nomber di Gobierno di Aruba a entrega e hobennan aki un rconocimento y a gradici nan pa nan determinacion pa pone Aruba su nomber na halto den exterior. E hobennan deportista a keda contento cu e reconocimento aki.