Den Haag – Miembronan di Parlamento di fraccionnan MEP, POR, RED y AVP a cuminsa cu e reunionnan di tripartiet precediendo e comienso di IPKO esta “Het Interparlementair Koninkrijksoverleg” na Den Haag den e diannan di 29 mei – 1 juni. E parlamentarionan ta discuti e importancia di e reunion di tripartiet cu ta entre e tres islanan autonomo den reino: Aruba, Curaçao y Sint Maarten. Tambe, e parlamentarionan di e diferente fraccionnan ta pone enfasis riba e retonan cu Aruba ta enfrentando, especialmente cu e lasonan di Reino y kico nan meta y vision ta pa alcansa e siman kinan na Hulanda. Parlamentario y fractievoorzitter di POR Drs. Marisol Lopez-Tromp ta splica cu e den e reunion di tripartiet ta fungi como preparacion pa IPKO. Segun Lopez-Tromp, un di e puntonan cu lo ricibi atencion particular riba dje na e reunion di tripartiet ta e tema di geschillenregeling cu ta referi na ora tin conflicto den reino, ta purba di yega na un modelo pa resolve e desacuerdonan na un manera husto. Especialmente mirando e acuerdo cu e diferente gobiernonan reino a cera 3 aña pasa pero gobierno di Hulanda no a honra esaki.
Presidente di parlamento sr. Ady Thijsen ta elabora riba e importancia di discuti y yega na acuerdonan encuanto e geschillenregeling. E areglo aki tawata den vigor desde desmantelacion di Antiyas y cu e cambio di statuut aki ta uno fundamental. Sr. Thijsen ta elabora cu e casmbio di articulo 12a di Statuut ta uno esencial pa cu e islanan di Reino, incluyendo Aruba. E articulo aki ta referi na momento di conflicto of diferencia di opinion, cu un instancia por wordo aserca pa yuda soluciona e disacuerdo existente. Den e caso aki, e intencion ta pa un instancia imparcial (onafhankelijk) ta esun cu ta tuma encargo. Actualmente, e acuerdo no ta wordo honra. Presidente di Parlamento ta argumenta cu esaki ta un falta di respet y cu fraccion di MEP su vision ta trece padilanti punto 1 y 2 di articulo 43 di Statuut unda ta referi na e paisnan den reino tin cu asumi responsabilidad pa “rechtszekerheid, deugdelijkheid van bestuur en verwezenlijken van de fundamentele rechten van de burgers”; algo cu Sr. Thijsen por cierto ta di opinion cu Hulanda no ta cumpliendo cune.
Voorzitter y Fractieleider di MEP sr. Rocco Tjon ta elabora riba otro puntonan di agenda. Apart di e geschillenregeling, pais Aruba lo trece riba e mesa e tema di samenwerking entre e islanan den enseñansa, CAFT y preocupacion grandi na Aruba encuanto e situacion di Venezuela y wak kico e punto di bista di Hulanda ta. Sr. Tjon ta añadi e retonan di e situacion financiero y social cu Aruba ta enfrentando y cu esaki ta topiconan hopi importante pa discuti cu Hulanda. Un di e negociacionnan di mas grandi cu Hulanda e siman aki lo ta tocante e status di CAFT pa asina busca solucionnan efectivo y na un manera responsabel lo trece sanacion pa e finansa publico di Aruba.
Parlamentario Marlon Sneek di fraccion di AVP ta di opinion cu e reunion di Tripartiet ta importante pa yuda coordinacion di pensamento entre e islanan den reino. Sr. Sneek ta enfatisa riba e importancia di mantene igualdad den status di e islanan. Diferencia di opinion semper tawatey, pero ta spera cu e deliberacion di e siman aki por yuda na yega na un mihor alternativa. Parlamentario di RED, Sr. Ricardo Croes ta conclui cu tripartiet y IPKO ta un bon oportunidad pa discuti puntonan importante cu ta afecta tur miembro di Reino. E parlamentario ta spera di por yega na un bon comprondemento y cooperacion entre e islanan di reino. Sr. Croes su speransa ta pa yega na un bon samenwerking entre e miembronan di parlamento di e diferente paisnan.
