Parlamentario Endy Croes como Vice presidente di Parlatino: Dirigiendo su promer reunion den Comision Asuntos Politicos y firmando un acta importante pa cu Rednan Social

Siman pasa diahuebs y diabierna tabata tin riba agenda reunionnan di Parlatino na e cede oficial di Parlatino na Panama. Desde yegada e delegacion di Aruba consistiendo di Endy, Rocco, Setty, Shailiny y Howell a wordo hopi bon ricibi. E delegacion di Aruba a asisti atendiendo 5 diferente Comision y Tema. Cada Parlamentario tabata ubica den diferente comision pa trata diferente topico manera Servicios Publico, combati narcotrafico, terorismo y crimen organisa, agricultura y pesca, turismo y medio ambiente pa nombra un par. Endy Croes sinembargo a wordo nombra como Vice presidente pa e Comision di Asuntos Politicos, Municipales y di Integracion y a reemplasa e Presidente di Mexico Enrique Jackson Ramirez kende no por tabata presente y asina Endy Croes den su promer bishita na reunionnan di Parlatino a haya su mes cu un encargo grandi pa dirigi e reunion den su totalidad.

Cumbre riba Fake Accounts
E reunion a bay super bon y representantenan sigur a keda hopi satisfecho. Parlamentarionan di Uruguay, Paraguay, Mexico, Argentina, Ecuador, Bolivia, Panama, Corsou, Venezuela y Aruba tabata den dicho reunion dirigi pa Aruba. Den e segundo mitar di atardi Endy a wordo aserca door di Presidente y secretario di Comision Servicios Publico Julio Montoya di Venezuela y Enrique Pintado di Uruguay cu un peticion pa agrega un punto riba e agenda cu Aruba tabata dirigiendo pa asina por tuma un decision conhuntamente cu dos comision. Den oranan di atardi Endy a manda yama representantenan di e otro comision cu a trece un punto hopi interesante na mesa. Un peticion pa Parlatino pa tuma contacto via canalnan oficial cu representantenan (CEO y CFO) di entre otro Facebook y demas rednan social. Final di November e aña aki sea na New York of na Europa lo organisa un cumbre pa asina atende cuestion di entre otro Fake Acccounts.

Espacio pa defende bo mes
Politiconan rond mundo ta wordo lastra inhustamente pa Fake accounts sin e derecho pa por defende nan mes y kier crea un espacio pa por defende nan mes. No kier mishi cu e libertad di expresion di ningun hende pero si kier tin e oportunidad pa por defende bo mes via e canalnan oficial. Pa defende bo mes bo mester por sa ta contra ken bo mester haci esaki. Ambos Comision a vota pro e mocion aki cu excepcion di Bolivia y asina a duna aprobacion pa e Presidente di Parlatino inicia e proceso pa organisa e cumbre aki. Alrespecto migracion y integracion tambe tabata tin un debate hopi positivo unda na final di e reunionnan tur hunto a firma un protocol pa cu esaki. Aruba por ta orguyoso di su representantenan.