Seroe Colorado, San Nicolas: Den oranan trempan di mainta un biaha mas un boto procedente di Venezuela a wordo mara y laga atras na e barancanan dilanti di santana di cacho. Manera ta conoci algun siman pasa gobierno a introduci un kust surveillance, pa asina trata na combati e traficacion di hende for di Venezuela. E traficacion di hende hopi biaha no ta bin solamente cu hende, pero hopi biaha nan ta trece arma, droga, otro articulonan di contrabando of tambe animalnan for di Venezuela cual sigur no ta wordo permiti pa drenta Aruba.
Den e ultimo simannan cu Gobierno a introduci e kust surveillance, e yegada di botonan aparentemente lo a bira hopi menos y no tabata hopi den noticia. E problema di traficacion di hende, arma, droga, bestia y articulonan di contrabando etc no a caba despues cu a introduci e kust surveillance, paso Diabierna mainta un biaha mas polis ta wordo notifica di un boto cu a wordo laga atras y probablemente no a trece solamente hende, pero mirando e boto ta inclina mas cu por ta trata di traficacion di arma y of droga.
E pregunta grandi ta; Con nan sa e orario cu tin kust surveillance? y unda e kust surveillance tabata ta? Cu e traficadornan aki por a drenta den tur trankilidad, te cu nan a mara e boto y bay for di e sitio. Aparentemente esaki a sosode den oranan trempan di mainta, paso den oranan di anochi pa mainta e kust surveillance ta activo na nos costanan. Of e kust surveillance no ta efectivo, of no ta suficiente pa combati e traficacion di hende, di droga, arma, bestia y articulonan di contrabanda. Ta spera cu pronto Gobierno bin cu aparatonan mas sofestica pa controla nos costanan y alaves combati y caba tur e traficacionnan aki cu sigur ta causando hopi daño y tin e pueblo di Aruba hopi preocupa.