Innovacion ta un palabra hopi popular den nos tempo aki cu un significado hopi positivo cu ta inspira hopi speransa. Innovacion kiermeen haci algo na un otro manera, un manera nobo. Hopi hende ta interpreta innovacion robes pensando cu esaki tin di haber cu computer, digitalisacion of automatisacion. Esakinan sigur ta parti di innovacion pero innovacion ta hopi mas amplio.
Prome Minister Evelyn Wever-Croes a expresa su alegria y satisfaccion di mira e aceptacion cu nos a haya despues cu a lansa e proyecto AREA. Esaki ta e proyecto cu lo bay trece bida bek den centro di ciudadnan San Nicolas y Oranjestad.
“Nos hendenan di Aruba ta hopi creativo. Hopi biaha e creatividad ta wordo aplica pa atende cu temanan na un manera diferente. E Arubiano ta expresa su creativad na un forma culminante den temporada di Carnaval. Haciendo Aruba unico den esaki. Esaki ta innovacion. Pasobra cada biaha ta bin cosnan nobo den Carnaval. Ta un hecho cu no tin bida den nos centro di ciudadnan di San Nicolas y Oranjestad. Apesar di tur intento, no a logra trece bida sino nos no ta para unda nos ta awe na unda cu te hasta nos centro di ciudadnan principal a haya e nomber di ghost town”.
E mandatario ta splica cu si cada biaha nos sigui haci e mesun cosnan, no por spera un resultado diferente. Pa cua motibo tambe Gobierno a dicidi di kibra cu e manera aki di haci cos y atende cu e temanan y e retonan cu nos tin na un manera nobo, un manera innova.
Diamars anochi na Cosecha Oranjestad y diaranson anochi na Cosecha San Nicolas, a pone e prome paso pa logra esaki unda cu a lansa e proyecto AREA. Aki a duna ciudadanonan e oportunidad pa comparti nan idea y sugerencianan creativo. E aceptacion na e proyecto aki tawata hopi grandi y satisfactorio na unda cu hopi ciudadanonan a bin pa comparti nan ideanan y asina contribui na e desaroyo innovativo di nos ciudadnan.
Prome Minister ta comprende e desilucion y decepcion di nos pueblo. Pasobra pa hopi aña pueblo a wordo engaña y manipula cu promesanan falso cu lo trece bida den nos ciudadnan sinembargo no a logra. Pero e mandatario ta sigur cu e biaha aki lo ta diferente. E responsabilidad di Gobierno aki ta mas grandi y lo percura pa e biaha aki si esaki bira un exito pasobra esaki lo wordo haci na un manera diferente.
“Gobierno lo organisa mas encuentronan asina p’asina haya mas ideanan y sugerencianan di nos comunidad. Di e manera aki Gobierno lo tin un bista di kico Aruba kier pa wordo drecha y unda mester bin cambionan. Mi ta gradici e comunidad di Aruba pa acudi y contribui cu nan aporte positivo. A sinti un aire di speransa y optimismo atrobe”, Prome Minister Evelyn Wever-Croes a bisa.